uMthunywa
UMzilakawulandelwa wathathwa ke wasiwa esibhedlela saseBerlin lapho ayesiyathola khona uncedo.
Laye uyancoma kakhulu indlela ayephethwe ngayo esibhedlela saseBerlini, wayephethwe njengeqanda okwamenza laye wakhululeka kakhulu wazizwa esekhaya ngempela.
EBerlin lapha benelisa ukuhlinza idolo lakhe babuye njalo balithunga sebehlanganisile imisipha eyayizondile ngendlela elobuciko kwaqala nje ukuba lomehluko omkhulu kakhulu laye nje wananzelela ukuthi unyawo lwakhe lwaseluqala ukuba lempilo, okokuthi lalapho encwetshwa lalo lwaselusizwa ubuhlungu.
Wayengakukholwa laye lokhu ayekubona ngonyawo lwakhe wayevele esekhethe ukuthi okwakhe kwasekuzaba yibulima kuphela nje, umoya wakhe wawusukwamukele lokho.
Kwathi nje ngemva kwensuku ezithile, elokhu esatotobisa laye wazilibazisa ngephephandaba lamaJelimani.
Kusobala ukuthi uMzila ngumuntu owayekhaliphile okwamagama, wayengalwazi ulimi lwesiJelimani kodwa simbona edobha okubili okuthathu kuphephandaba lakhona, okwakumayelana lelelizwe leZimbabwe.
Kukhanya ilizwe leZimbabwe leli laliyindaba eyayisegudwini ngalezo nsuku. Okwakusenza ibe yindaba esegudwini kwakuyikulwisana ngemilomo phakathi kweziphathamandla zombuso wase Rhodesia kanye labakhokheli babalweli bombuso wenkululeko.
Iziphathamandla lezi zazihlangene eLancaster kwelase Bhilithani, lapho ke kwakuphoselwana inyoka ephilayo singekho isikhathi sokuncengana. Inkokheli zabalweli benkululeko, ezombuso wabaNsundu zonke zazikhala ngokuthi nxa kwakusehlula ukuthi bakhulumisane bavumelane ngomlomo bona babezimisele ukuhlomisa amabutho azo ngamandla amakhulu avele abuyele empini.
