uMthunywa
Olwalotshwa ngu B D Ndlovu
NGEVIKI edluleyo sitshiye ibutho elaselikhokhelwa nguKillem selilungiselela ukuyahlasela iRest Camp lapho okwakusadingeka khona ukuthi bacwayisise kabanzi ngokuma kwezinto kuleyondawo ukuze nxa sebehlasela bahlasele ngelihlo elikhaliphileyo ukuze bangagadlwa yisitha.
Iqembu lesibili elalikhethiwe lalikhokhelwa nguBulalibhunu lona-ke laliphiwe umsebenzi wokuyahlola umgwaqo uFighting Road. Lapha kwakumele baqaphe ngokungena kwesitha lokuthi babengathiya njani umaquphula ukuze batshaye baquphule lesi sitha ngesikhathi singakhangelelanga kuhlaselwa.
UMzilakawulandelwa yena-ke wayeseqenjini okwakumele liqonde eJibajiba ukuyahlola ngomumo owawuqhubeka kuleyo ndawo njengoba kwasekuyindawo yesitha.
Bakhetha imibhobho phakathi kwemixhakaxhaka yezikhali ezazikhona. Izikhali lezo zazifihlwa ngobunono obukhulu ukuze zingabonwa laloba ngubani nje owayezihambela. Bonke bahloma baphelela bangena igusu behlomile ngenhloso yokufeza umsebenzi omkhulu. Ukuhamba lokhu yinto nje ababengasayithathi mango kungakhathalekile ukuthi kwakuyisikhathi bani lokuthi babedlula phakathi kobunzima obungakanani kanye lezinanakazana ezaziphila emangweni ababedlula kuwo.
Ngolunye uhlupho olwaluhlangana labantu abamnyama lolu ukusweleka kwenyawo ezilula ngesikhathi sokulwa. Baludonsa uhambo lwabo phakathi komnyama owawusidla impisi baze bezwa nje sekunuka amanzi omfula uJibajiba bahle nje bazi ukuthi isitha sesiduze sekudingeka baqaphele, bakubona kufanele ukuthi bahlole emsileni babuye njalo bahlole lasemhlubulweni.
UMzilakawulandlwa yena-ke waphuma loDligazi banqwetha-ke besiyaphosa ilihlo phetsheya banquma isinqumo sokuthi babezahlangana ngelilandelayo ngaphetsheya komgwaqo uFighting Road.
Behla-ke loDligazi bawela umfula uLupane. Kwakunzima ukuhamba kwakhona ngoba izulu lalinile ngobusuku obabudlule. Indawo yonke yayigcwele amanzi begxabhuza emanzini, okunye njalo okuchaza ubunzima ababekhangelane labo kwazi bani ngemvunulo ababelayo ukuthi yayivikela na izulu leli lamanzi ababedlula phakathi kwawo bengabantu njalo ababehlala eguswini.
Ekufikeni kwabo lapha emfuleni bawuthola lawo ugcwalisa okusobala ukuthi kwakungeke nje kube lula ukuchapha bananzelela ukuthi lalikhona ibholoho ababengachapha kulo kodwa-ke lokho kwakungesumqondo omuhle ukuthi bachaphe khona ngoba labo babeqonqoselwe kakhulu ukuthi kulapho isitha esasingatholakala sicandeme khona.
Ngokunanzelela thize ukuhamba kwesitha, babeyilabo ababehamba endaweni ezilula, babengathandi bona ukudlula phakathi kwendlela ezihlukumezayo yikho nje singababoni bethubela phakathi kwamagusu.
