uMthunywa
Imbongi nguDedani Moyo
Isihloko senkondlo — Mam’omncane
OKUMELE sikubeke mgceke yikuthi nguphi umam’omncane imbongi ekhuluma ngaye lapha. Umam’omncane ukabili ngoba umnawakhe kamama ngumam’omncane kanti njalo umama othathwa ngubaba ngemva kukamama ngumam’omncane njalo. Esihlangana lakho lapha ngumntwana oveza ukukhathazeka ngohlupho ahlangana lalo ngemva kokuba uyise ethethe unin’omncane. Kwasekube lengxabano phakathi kukanina loyise.
Ingxabano leyo eyabakhona kulowomuzi yenza unina womntwana lo wabopha ezakhe impahla wahamba. Iyakhala le ingane ithi uyise wayenza yathwala nzima. Ithwele nzima okumangalisayo lingane ikufakaza ngesitsho esithi, “ngihlezi phezu kwamalahle, ngithwele avuzayo.” Lapha uthwele avuzayo utsho ukuthi uthwele amanzi ngamagabha avuzayo. Ngumsebenzi onzima kakhulu wokuthwala amanzi ngamagabha avuzayo.
Lokhu kufakaza ukuthi lumntwana usethwele nzima lapha ekhaya ngokufika kukanin’omncane osethethwe nguyise ngemva kokusuka kukanina. Unin’omncane lo ulochuku kulumntwana. Ngokunjalo umntwana lo usekhumbula emuva ukuthi uyise lonina bamzala ngothando kodwa lolothando lwaphanga lwaphela.
Lwaphela ngemva kwesikhatshana lolothando, lwanyamalala indawo yalo yathathwa yinzondo enkulu. Sekufike inzondo unina walumntwana wehluleka ukukumela lokho wathwala eyakhe imitshaqana.
Wathwala ezakhe impahla unina walingane, wayifulathela wayitshiya loyise. Esesele loyise lumntwana wahlangana lohlupho olukhulu, lokhu ekufakaza ngamazwi ajiyileyo, isitsho esithi, “Kanti ngizabona okwabonwa yingidi.” Nxa siphelele lesi sitsho sithi, “okwabonwa yingidi ithwele ilahle.” Lokhu kukhulunywa ngumuntu oyabe ephakathi kobunzima obukhulu. Siyakubona ngelihlo lengqondo lokhu ukuthi lamanje lumntwana wayesephakathi kobunzima ngenxa kanina omncane.
Njengazo zonke izinto kuqala kukuhle kodwa lobo buhle buye buphela. Uyatsho lumntwana ukuthi uyise waqala ezama ukumnanza unina esanda kuhamba. Uyise wayemgezisa, emhlambela impahla, emphekela njalo emfunza ukudla, kodwa uyise waphanga wadinwa yikwenza lokho. Esediniwe uyise wathalaza eceleni, wakhangekhangela wasemdingela unin’omncane. Njengoba ngibethile ngaphambili, insuku zokuqala zaqala zihamba kuhle.
Lumntwana khathesi inkulumo yakhe uyibhekisa kunin’omncane, uthi waqala kuhle esazama ukuthabisa uyise yena nin’omncane lowo. Wazama ukumnanza umntwana lo yena nin’omncane ngoba esafika. Kodwa wonela ukumila impande okutsho ukuthi wonela ukuthi abone ukuthi usehlezi sibili waqala ukumhlupha umntwana. Lokhu kuvezwa mgceke yisitsho, “Waqal’ukungidlisa luklubhu.” Umntwana lo waqala ukuncitshwa ukudla ngunin’omncane ngoba uthi ukudla wakudla emoyeni.
Wayengasathakazelelwa lumntwana ngunin’omncane ngoba uthi “amazinyo wangivezel’awenja.” Wayengamhlekeli okutsho ukuthi umntwana nxa wayebona amazinyo kanina omncane kwakungasikuthi uyamthokozelela kodwa kwakuveza inzondo njengenja evula amazinyo nxa ifuna ukuluma umuntu.
