uMthunywa
Imisebe yelanga, Imbongi nguKevin N Mathe
Imbongi lapha ikhuluma ngento eyinsindabaphenduli, isifo esingelaphekiyo. Sesisazi sonke, sesize sisaziwa langabantwana abancane lesisifo esingelaphekiyo iAids ebizwa ngokuthi yingculaza esiNdebeleni. Kayelapheki ingculaza njalo sesizwile kuyonale inkondlo ukuthi isiyehlule amadokotela esiLungu kanye laboSiwaluwalu, inyanga zakithi ezinsundu phela.
-Akula ongasidliyo leso sithelo semvelo yikho nje lesi sifo esingelaphekiyo sihlekelela ngoba sisazi ukuthi wonke odla lesi sithelo kayikuphepha kuso. Kufana lomuntu othiya umjibila wakhe esazi ukuthi uzajimba ngempela lokho akuthiyileyo. Iyaphambili imbongi isitshela ukuthi lesi sifo esingelaphekiyo siyinkinga okutsho ukuthi kasiqedisiseki kumbe kasizwisiseki. Lokhu kungenxa yokuthi sitshiye umlungu ewunkemile umlomo okutsho ukuthi usele emangele umlungu ngoba wayethwale amayika akhe ethi ulwa laso lesi sifo esingelaphekiyo.
Kodwa ulwazi lwakhe lowo mlungu lwabayize kulesi sifo esingelaphekiyo. Wayesebonile ukuthi lesi sifo siyinqaba okungathandwa yimbongi yikho isithi, “Esebonil’ukuthi uyinqaba sifondini.” U -ndini esiNdebeleni utshengisa inzondo kuleyonto okhuluma ngayo. Iyagcizelela imbongi ukungazwisiseki kwesifo lesi yikho nje isithi,
“Sif’esingelaphekiy’uyisimanga.” USiwaluwalu, inyanga zesiNtu, kuthiwa lesi sifo simtshiye esangene ikhanda okutsho ukuthi simtshiye ephambene ikhanda. Wawatshaya amathambo uSiwaluwalu emkhomba umthakathi.
Kodwa isifo esingelaphekiyo sahlekelela ngaphakathi nxa sibona uSiwaluwalu esenzenje ekhomba umthakathi ongekhoyo, sabona lobuze bemgcozo kaSiwaluwalu. Lokhu kusifundisa ubuze bokuya kuboSiwaluwalu nxa sesithe sahlasela lesi sifo esingelaphekiyo. Ngenye indlela oSiwaluwalu balamanga baxabanisa abantu bethi bathakathwe ngozibanibani kanti bona bahlaselwe yisifo esingelaphekiyo. Imbongi iyasitshela lesi sifo ukuthi silesihluku ngoba nangu uMaDube simgqokisa ezimnyama, esefelwe ngumyeni wakhe phela.
Lesi sifo samtshiya egalula phakathi kosizi uMaDube. Kusenjalo sayihluthuna lengane yakhe ethembile ukuthi izaphila. Ngenxa yokuswela uzwelo lesi sifo esingelaphekiyo sahlekela ngaphakathi ngesenzo saso esibi. Ngenxa yalesi sifo esingelaphekiyo akusela masoka phakathi kwabantu. Amajaha asezile ubusoka bawo nokwesaba lesi sifo.
Amajaha asephenduke izigwadi engesizo ngoba siyesabeka lesi sifo. Ayawabona amatshitshi edlula amajaha kodwa engawaqomisi, imbongi ithi ayawakhangela amajaha asuthe ngamehlo kuphela.
Izigwadi lazo, amajaha angakhonjwayo abuqinisile ubugwadi bawo. IsiNtu laso silahlelwa khatshana ngenxa yalesi sifo ngoba uJojo kamngenanga umkamnewabo owabhubhayo ngenxa yokwesaba lesi sifo esingelaphekiyo esicunula imbongi ize ithi, “UJojo angamngen’umkamnewabo ngob’wesaba wena mthakathi wezigodo. Kusobala ngamazwi anje ukuthi imbongi iyasizonda lesi sifo esingelaphekiyo njalo kakho osithandayo longasesabiyo.
