uMthunywa
IMBONGI isibikela obala ngento okuthiwa luthando. Lapha uthando lukabili; oluthombileyo, olujiyileyo njalo lungasacengeki. Ngakwelinye icele kukhona abathi luthando kanti ligugu nje kuphela — ngabatsha laba abalubona ngale indlela. Abanye labo abadala kabaluqedisisi uthando olunzulu, badonswa lihuha nje kuphela bethi basethandweni. Ukudonswa lihuha lokhu kutsho ukuthatheka ngolutho ongaluzwisisiyo.
Lapha imbongi isivezela ukuthi olwabo lesithandwa sayo seluthombile. Ngenye indlela kutsho ukuthi olwabo seluzikile, seluqinile lungezake luchithwe mahlayana nje. Olwabo selujiyile, lulempande lubahlanganisile alusanyikinyeki. Uthando olunje lulesisindo lungezake lukhohlakale luphethwe kalula. Olwembongi lomunye wayo lujulile alusacengeki lubambene njalo luyababambanisa ukuze bengehlukani futhi.
Olwembongi lesithandwa sayo lumi okulaphakade okungapheliyo, kukanti ngakwelinye icele lolo oluligugu luyaphela. Lukhona okwesikhatshana luphange lwedlule. Ihuha lalo liyacitsha kodwa imithambo yothando oluzikileyo kayitshi. Inziki yothando layo kayiladondolo okuyikuthi uthando olutshonayo kaludingi kusekelwa emaceleni ukuthi lungawi kumbe luphele. Luma kokuphela uthando oluzikileyo.
Ngenxa yothando elalo imbongi kusithandwa sayo ithi iyalwesaba usuku lolo abazakwehlukana kwabo.
Ukwehlukana lokho kungabe kuzabangelwa yikufa ngoba khona kuyikho ehlukanisa abantu lanxa beyizithandani ezibambane njani. Kayifisi lufike lolo suku lapho abazehlukana khona. Imbongi ithi sekungathi bengaqhubana lomunye wayo kungabi lanyembezi zicenga lokho osekwajiyayo. Ngalokhu imbongi ikhala ngokuthi sengathi uNkulunkulu umdali wabo angabagcina yena lesithandwa sayo baze bafe ngasikhathi sinye kungekho obehlukanisileyo kukuthandana kwabo okuzikileyo.
Imbongi ithi ikhangela emuva le endulo umhlaba uselamantombazana amahle, amaklwinti phela. Abantu besaziphatha kuhle behlonipha belobuntu. Ngaleso sikhathi esibonwa yimbongi ubungakangeni umtshazo lo obunisa isizwe. Imbongi ikhangela impilo ngelihlo lakudala ilizwe lisakhile abantu besahloniphana, abantwana behlonipha wonke umuntu omdala samzali wabo. Kwakungakangeni lokhu esikubona imbongi lapho osekugcwele ukuxhwala abantwana sebemelana labazali babo, banathisane labo utshwala kuthi abafana baqomise bathandane labomama abangangabonina. Kuthi olababili bathathu kuthiwe yintombi.
Imbongi ithi umtshazo lo osukhona usubunise ilizwe kanye lomuntu. Isihlahla nxa sesibunile sesifile asiselampilo kanti lomuntu laye usengophelelwe lithemba uselengele ekufeni. Ubuzwe bakhe sebufile kaselasithunzi. Ngenxa yalokhu imbongi isibuza kuMdali wayo uNkulunkulu ithi: “Kwenzenjani Mbumbi, ebumbeni kuyinkungu yodwa nje phambili? Kodwa kuwe wedwa ngilethemba! Themba lami!”
Sekulenguquko embi ekhona ebantwini osekumangalisa imbongi ize ibuze kuMdali ukuthi kungabe sekwenzenjani ebantwini bakhe osekubaguqule izimilo zabo bathanda izinto ezingalunganga? Yona imbongi ithi lanxa kunjalo kodwa kuye yedwa uMdali wayo ilethemba, njalo ulithemba layo. Ngamanye amazwi imbongi ithembela kuNkulunkulu wayo lanxa sekunjani.
