uMthunywa
NGITHANDA abafundi bananzelele lapha ukuthi imbongi uMihla Sitsha iloba ngeqhawe elikhulu kusizwe seZimbabwe, umuyi uJoshua Mqabuko Nkomo, lanxa engahlange wabhadlaza ibizo lalo ekuqaleni. Imbongi uThabo J C Nkomo kugwalo olufanayo Imisebe Yelanga layo ilobe idumisa iqhawe elifanayo. Kusiya ngami abafundi bebengazifunda ngasikhathi sinye lezinkondlo bazifananise njalo baziqathanise njengoba zikhuluma ngodaba lunye.
Angizukuphinda eyembongi uThabo J C Nkomo ngoba siyenzile kulelikhasi kunsuku ezidlulileyo. Lamhlanje sicubungula ethi, “Ilanga lisitshonele” yona elotshwe yimbongi uSitsha. USitsha ukhuluma ngalo leliqhawe elikhulu uJoshua Mqabuko Nkomo. Inkondlo le ilotshwe ngemva kokuba selitshonile kumbe selibhubhile leliqhawe. Ubengumuntu omkhulu oqakathekileyo kwezombusazwe uJoshua Mqabuko Nkomo yikho nje limbongi ingathekisa imfanisa lelanga lona elikhanyisa umhlaba wonke kuthi lingatshona kube lomnyama owesabekayo.
Njengomuntu obeqakathekile kusizwe seZimbabwe imbongi ithi ngokukhothama kwalo selibatshonele ilanga ebelibakhanyisela. Sebesele emnyameni ngoba lowo obebathungamela ebakhokhela engasekho. Kusobala ukuthi belilikhulu leliqhawe elinguNkomo ngoba kunzima kumbongi ukuthi ikukholwe lokho ekuzwayo ukuba iqhawe leli elikhulu seledlule emhlabeni. Nxa ekuzwa lokho kufa kweqhawe leli uyathandabuza aze abuze ukuthi kungabe indlebe zakhe zizwa iqiniso na kumbe zimqambela amanga.
“Ndlebe zami lizwani, alingisenge’ ezimithiyo yini?” Ukusenga ezimithithiyo yikuqamba amanga yikho nje imbongi ibuza indlebe zayo ukuthi kazimqambeli amanga yini?” Akusindlebe zayo zodwa engazithembiyo imbongi ukuthi zizwa iqiniso kodwa lamehlo ayo lawo iyasola ukuthi abona iqiniso kumbe njalo ulele ukuthi lokho akubonayo kungabe kungamaphupho nje kuphela. “Mehl’am’ukhangele yini? Kambe kangilalanga yini?”
Iyaphambili imbongi iveza ukuthi kambe lokhu ekubonayo kungabe kungayisiphupho eliphupha imile yini?
Okuvelayo yikuthi kayiphuphi imbongi ngoba isizincwebe yaze yopha izama ukuqedisisa ukuthi kayiphuphi yini. Iqiniso yikuthi kayiphuphi kodwa ngeqiniso sekwenzakele iqhawe elikhulu uJoshua Mqabuko Nkomo usekhotheme yikho nje ikufaka ngesitsho, ithi selidume ledlula okutsho ukuthi ngempela selitshonile iqhawe.
Ngokutshona kweqhawe leli imbongi ithi sebembeswe liyezi elimnyama, ilanga selibatshonele kusemini.
Ukukhanya abebelakho ngenxa yeqhawe leli sokubaphelele abaselathemba empilweni zabo.
Imbongi uSitsha isebenzisa izingakethiso ezinengi ekuchazeni uJoshua Mqabuko Nkomo. Sesitshilo ukuthi uchazwa njengelanga ekuqaleni kwenkondlo. Sihlangana lelinye ibizo elisetshenziswa yimbongi nxa sisehla layo.
Imbongi ithi, “Intaba idilike bakithi”. Iqhubekela phambili ithi, “Umkhom’uswab’impande,” “Indlov’iwele phansi”.
Wonke la amabala asetshenziswe lapha atshengisa ubukhulu beqhawe elinguJoshua Mqabuko Nkomo. Intaba yinto enkulu okungathandabuzwayo ubukhulu bayo kanti lesihlahla somkhomo sikhulu, nxa sesiswabe impande kutsho ukuthi akusela kuphila kuso.
Indlovu layo, mamo! Yinyamazana enkulu okwamagama okokuthi nxa iwele phansi kulokwesaba lokwethuka okubakhona ebantwini. Ngokufanayo-ke ukudlula kwaleliqhawe elinguJoshua Mqabuko Nkomo kwaletha ukudangala ebantwini baseZimbabwe. Abanye bethuka bengakholwa lokho abakuzwayo. Kayiphelanga lapha linkondlo, nxa isikhathi sivuma sizayiphutshisa kunsuku ezizayo.
