uMthunywa
Inkondlo le ingumbuzo ovela kujaha okumele ukuthi aluba seliqonyiwe kodwa akukenzeki lokhu ngoba lifikelwa yitwetwe, okutsho ukuthi litshaywa luvalo nxa sekufika kulezo.
Selifika kusibanga sokuzinikela ijaha leli ukuthi isikhathi sesiside, kuzaze kubenini lilokhu lithikaza ukuvula umlomo walo liqomise. Selibuza leli ijaha ukuthi koze kubenini lilokhu livale umlomo lingafuni ukuzinikela liqomise.
“Koze kubenini? Umlom’ulokh’ugcikekile Samanz’egcikwe ngomtshibi.” Siyasibone abantu bevela kukha amanzi emakhaya bewagcike ngomtshibi ukuze engahambi ekhaphaka.
Lapha lelijaha lifanisa ukuvala kwalo umlomo lingaqomisi samanzi agcikwe ngumtshibi. Liyabuza lelijaha ukuthi koze kube nini lilokhe liqhuqha ngokwesaba ukuqomisa? Nxa licabanga ukuqomisa amadolo alo ayagedezela eqhuqha ngenxa yokwesaba ukutshela intombi ukuthi liyayithanda.
Amadolo la ayagedezela njengawenyamazana esenziwa yintolo ikakhulu ebusika. Ebusika inyamazana ziyehluleka ukugijima kakhulu ngoba amadolo eselentolo ngenxa yokuthi kazisuthi ngendlela efaneleyo.
Ngobugwala bokwesaba ukuqomisa inhliziyo layo itshaya ngamandla okomuntu olesifo senhliziyo. Ijaha leli litshengisa ukuthi liyisima kanjani ngenxa yokwesaba ukuqomisa.
Amaphaphu alokhu ephaphulana kumbe ebhulana ngenxa yokwesaba ukuzibika entombini ayifunayo.
Ujaha lo useginye amathe okungapheliyo, uthi usesenza angathi kaphelelanga ngenxa yobuhle bentandokazi uNtando. Inhle intandokazi le eyenza lujaha engathi kaphelelanga.
Liyaqhubeka lelijaha libikela isizwe ukuthi lobo buhle buyayiphandla okwensaba zelanga nxa liphuma.
Siyananzelela ukuthi kunzima ukukhangela ilanga nxa liphuma ngenxa yokuphandlwa zinsaba zelanga.
Ngesikhathi ephandlwa yilobo buhle bentandokazi kaNtando ukhumbula kwelakhe ixhiba, indlu yamajaha, ayecambalala (ayelala kulo ecabangisisa ngobuhle baleyo ntombi.
Liyazeyisa lelo ijaha ngoba lithi lobo buhle balintombi abungeke buyifanele ngoba yena mubi kakhulu ekuchaza ngalamazwi athi, “Mina nduna yezibonkolo.”
Izibonkolo yinto ezimbi kakhulu okokuthi nxa kuthiwa uyisibonkolo mubi kakhulu ngoba nanku abanye nxa bemkhangele ezithulele babona angathi uyakhala.
Mubi lujaha kodwa yena kazikhathazi ngalokho uzikhumbulela ngekusasa lakhe. Sekufike isibanga ukuthi ijaha leli selibuza ukuthi koze kube nini lilokhu lisithi kayilifanelanga lintombi lithikaza ukuyitshela amagama alo, amazwi alo phela.
Ijaha leli lithikaza ukutshela lintombi amagama alo ngoba lithi ifanele abaphezulu kulalo, abahamba ngendizamtshina, bona abandiza emoyeni njengenyoni.
Kodwa sokufike isikhathi sokuqunga isibindi ayilande lintombi. Kaliselandaba lelijaha ukuthi lona liphansi liyangekile. Selisithi kaliginye ilitshe, libe lesibindi, litabayile, lihambe ngamanyathela liyilande lintombi ngoba phela lingumuntu kayisiyo inyamazana.
Sekuphelile ukwesaba ukweshela, ukuqomisa lintombi yikho ijaha leli selibuza ukuthi koze kubenini lilokhu lisesaba ukuqomisa.
