uMthunywa
Ethel Ncube
KULENDODA yeChivi emiswe emthethwandaba weChiredzi ngeviki ephelileyo isetheswa icala lokuhlangana lowesifazana othengisa umzimba ingagqokanga ijazi lomkhwenyana ibuye imkhuthuze imali ethenge ngayo ucansi lomakhalekhukhwini.
Umsolwa uPeter Gwabvira wayevumelene lomamangala ukuba bazahlangana kulejazi lomkhwenyana abhadale i-R200 kodwa umsolwa wala ukuligqoka.
Umtshutshisi uTanyaradza Tinagwo uveze ukuba ababili laba sebevumelene umsolwa wabhadala kodwa wabuye wephula isivumelwano.
Kubikwa mhlaka 23 kunyanga kaMbimbitho uPeter Gwabvira wahlangana lomamangala bavumelana ukuba bazahlangana nge-R200 kusentshenziswa ikhondomu.
Bathe sebevumelene bahamba emoteni kaGwabvira bathola abangane bakamsolwa besemoteni baqonda egangeni lapho abathi befika wala ukugqoka ijazi ngemva kokumethusela ngengqamu.
Uthe eqeda lapho wabuye wathathela umamangala umakhalekhukwini lemali R200 ayembhadale ngayo.
Umamangala kubikwa wathi esuka lapho wayabikela amapholisa okuyikho okwenza umsolwa wabotshwa.
UMantshi uVimbai Mutuka uthe umsolwa uzalinda ukuba abuyele emthethwandaba mhlaka 8 kuyonale inyanga esejele.
