uMthunywa
Kuloba UDkt Dennis Mlandelwa Sinyolo eseBelgium
KULIVIKI bakwethu sizakhangela ezenkolo. Phela umuntu wadalwa elesifiso sokukhonza uSomandla. Nxa umuntu esephakathi kobunzima usuka akhangele emandleni angaphezu kwawomuntu ukuze athole uncedo. Kuliviki sizaxoxa ngokholo lwesi-Islam.
Ukholo lwe-Islam lwasungulwa yindoda eyaziwa ngokuthi nguMohammed, elizweni laseSaudi Arabia eliseMpumalanga ePhakathi. Seyasabalala linkolo yafika phose kuwo wonke amagumbi amane omhlaba.
Abantu balolukholo babala ugwalo oluthiwa yiKoran. Lolugwalo lungcwele kibo njengoba nje iBhayibhili lingcwele kumaKhristu.
Abantu abakhonza ukholo lwesi-Islam baziwa ngokuthi ngamaMoslem. Kuvame ukuthi amanina akhona amboze amakhanda amadoda angageli indevu njengamaPositoli. ESaudi Arabia lakwamanye amazwe akulumhlubulo omama bavame ukugqoka izigqoko ezimnyama, obaba ezimhlophe.
Abacubunguli bezenkolo bathi ukholo lwesi-Islam lwadabuka kuAbrahama, onguye ukhokho wabo. Phela nxa ubala iBhayibhili uzathola ukuthi uAbrahama wayelamadodana amabili, u-Isaka owaziwa ngamaKhristu amanengi lo-Ishumayeli ayemzele lonkazana owayebasebenzela.
Phela u-Sara umka-Abrahama wathi ezibona engela nzalo wasencenga indoda yakhe ukuthi ingene kusisebenzi lesi ukuze bathole ingane. U-Ishumayeli nguye umdabuli wama-Arabhu-lapho okwaqhamuka khona ukholo lwesi-Islam.
Indawo lapho abakhonzela khona lababantu ithiwa yi-mosque. Phela ayatshiseka bantu amaMoslem, akhuleka kahlanu ngelanga. Nxa bekhuleka bayabe beguqile betshayelela amabunzi phansi bebheke idolobho leMeca okuyikho okwazalelwa khona uMohammed.
Nxa ungena endlini yabo yokukhonzela uyakhulula izicathulo, ugeze inyawo ubusungena ubhaduzela, abathi yindlela yokuhlonipha u-Allah eliyilo igama loMdali kibo.
Phela kubikwa uTony Blaire lo owayenguPrime Minister weUnited Kingdom wake wethekelela iMosque kwelinye ilizwe bamkhululisa izicathulo, kanti umkhokheli amasokisi abhobokile. Zahle zasizakala inthathelizindaba; amakhamera nzo enyaweni, imbobo zamasokisi zaba yindaba egudwini.
Akhona amaMoslem esingathi aphakathi laphakathi, abekhona njalo atshisekayo okokuthi ungazama ukuphikisana lawo kumbe ukubatshumayeza ngesiKhristu ulakho ukungena ejele kumbe ubulawe. Phela ungakhangela izimpi ezinengi zibabulalisa abantu abangelacala amazweni anjengeBelgium, eFrance, USA lakwezinye izindawo kubangelwa yilababantu abatshiseka okwedlulise amalawulo.
EPakistan kulomama ongumKhristu owabotshwa wagwetshelwa ukubulawa ngoba wayesuke waphikisana labomakhelwane bakhe abangamaMoslem ababesala ukumxhawula bethi ungcolile ngoba engumKhristu. Kwanceda umkhankaso wamaKhristu laboHulumende bamanye amazwe, wasekhutshwa-ke ejele wabalekiselwa eCanada lapho aseyisiphepheli khona. Ojaji abamkhuphayo basongelwa ngokubulalwa, kwathi uMinister owayekhankasele ukuthi akhutshwe ejele ngoba ethi kalacala bahle bamfaka uhlamvu waya kogoqwanyawo.
Kwamanye amazwe alandela lolukholo ungantshontsha uyaqunywa isandla, kuthi owesifazane ofebileyo akhandwe ngamatshe aze afe. Intombazana ingazala ingendanga iyabulawa ngoba kuthiwa ilethe ihlazo emulini. Manengi amantombazana abaleka emazweni anjengeSaudi Arabia ngoba bethi bayacindezelwa — phela nxa ungowesifazane awuvunyelwa ukuphuma wedwa endlini ungaphiwanga imvumo ngowesilisa okumele ahambe ekukhaphile. Kuyo yonke liminyaka abesifazane bebengavunyelwa ukutshayela izimota.
Loba kunjalo, nxa ukhuluma lamaMoslem amanengi agcizelela ukuthi i-Islam lukholo lokuthula olugcizelela ukunceda lokuhlala kuhle labanye abantu. Ngeqiniso, akumelanga abantu baxabane ngenxa yenkolo kumbe imibono etshiyeneyo.
