uMthunywa
Ncekwenhle Ncube
NGEMPELA ‘‘imali yimpande yesono’’ nanko phela kulenina lelokitshini leNew Luveve koBulawayo elitshile umkalo intamo wafa ngoba lifuna ilifa.
Umsolwa uFlorence Mazhanga umiswe phambi kwenkundla yeTredgold koBulawayo ngoLwesine ngeviki edluleyo esetheswa icala lokubulala umkakhe ngenhloso.
Inkundla ibikelwe ukuthi umtakamuyi uChristine Nyathi wacela umetheswacala ngomnyaka ka2011 ukuthi azosebenza endlini ngemva kokufelwa ngunina uAlice Nyathi.
Ngokuya kwesikhathi umsolwa wacina sethandana loyise kaChristine, osengumuyi.
Umtshutshisi kulelicala uMnumzana Gladmore Mushowe ubikele inkundla ukuthi umufi watshaywa yizinto okwenza wangenelisi ukusebenzisa umhlubulo wanganxanye.
Uqhubekele phambili esethulela inkundla ukuthi umetheswacala nguye owayeselomlandu wokugezisa umufi ngalesi isikhathi engasenelisi ukuzenzela ulutho. Kwesinye isikhathi wayezitshiya okwabangela ukuthi umsolwa engasalali endlini eyodwa lomufi.
Kubikwa mhlaka 8 Nhlangula umetheswacala wangena endlini kamufi emini watshila umuyi intamo. Uthe eqeda lapho wavala indlu wahluthulela lesango wahamba. Kubikwa waze waphenduka ngehola lesikhombisa ebusuku lapho ahlaba khona umkhosi ethi uthole isoka lakhe selitshonile.
Inkundla izwe ukuthi kwabizwa amapholisa ukuzodingisisa mayelana lesehlakalo lesi. Amapholisa ancwetshwa udletshana ngomakhelwane ukuthi kwezinye izikhathi umsolwa wayetshaya umufi nxa engazitshiya.
Lokhu kwenza isidumbu sathwalelwa esibhedlela ukuyahlolwa. Amadokotela athola ukuthi umufi katshonanga nje kodwa ubulewe.
Ngesizatho sokuthi kwakungela zibonakaliso zokuthi kungene amasela endlini kamufi kwenza amapholisa acabangela umsolwa okwenza wabotshwa walethwa emthethwandaba.
Umantshi kulelicala uNkosikazi Charity Maphosa uthe icala lizaqhubekela phambili mhlaka 1 Mpandula.
