uMthunywa
NGESIKHATHI omama bejabulela usuku lwabo ngeSonto, uNkosazana Bongiwe Mhlongo (50) waseChesterville ubekhala ezimathonsi ngokuhlutshwa yindodana yakhe (37) athi ilala lezintombi phambi kwakhe.
Uthi uma eyikhuza ivele imtshaye, imbize ngazo zonke inhlamba.
Umuzi kaNksz Mhlongo awulazo izivalo emakalweni. Uthi ngesikhathi ecela ukuvala ngekhethini indodana yakhe yamtshela ukuthi ayifuni ukuvala ngoba ifuna “abone konke ekwenza lentombi zayo ngoba uthi lami ngingumfazi.”
“Omunye umzukulu wami (12) uhambile, angikwazi lokuthi ungaphi ngoba uthe emkhuza ngemikhuba kayise wavele wamsabisa ngokuthi uzamtshaya.
Angisakwazi ukuthi ngiyengaphi khathesi ngoba ngibona umthetho ungasebenzi. Indodana yami ilomuzi wayo kodwa izongihlukumeza emzini engawutshiyelwa ngumamncane. Ngiletshukela manje isimo siba nzima. Ngiyacela amapholisa angisize,” kutsho uNksz Mhlongo.
Isolezwe labika ngodaba lukaNkszn Mhlongo ngo-2013 eveza ukuthi wakhulelwa indodana yakhe emva kokudlwengulwa yindoda eyayitshade lonina.
“Indodana yami ngayitshela ileminyaka engu-17 ukuthi ngadlwengulwa ngumuntu owayetshade lomama, ngileminyaka engu-14 ngase ngikhulelwa yena.
Kusukela lapho uyangizonda futhi uze angisongele lokungibulala. Uthi ngangithanda ukulala lobaba.
Okubuhlungu yikuthi ngilivulile icala emapholiseni, laya enkantolo yathi kufanele ihambe indodana yami kodwa ngizwe sekuthiwa liphelile icala,” kutsho uNksz Mhlongo.
Uthe uhlala labazukulu bakhe ababili ahlukunyezwa labo yindodana yakhe.
“Ngiyafisa ukuthi amapholisa ambophe ngoba usiphilisa nzima labazukulu. Besingcwaba unina wezingane zakhe ngoMabasa, usethathe amakhadi esibonelo sezingane wawanika intombi yakhe. Okubuhlungu yikuthi izingane akazenzeli lutho. Uma ngiya emapholiseni umseshi uthi angivule elinye icala.
Inkinga yikuthi indodana yami yenza into eyodwa ayitshintshi, iyangihlupha,” kutsho uNksz Mhlongo.
Imizamo yokuzwa uhlangothi lwendodana kaNksz Mhlongo ayiphumelelanga. Inombolo yayo yocingo ibingasebenzi.
Ababhekele uphiko lwezokuxhumana emapholiseni KwaZulu-Natal, bathe bazokwazi ukuphendula sebekhulume lomsetshi ngecala elivulwe nguNksz Mhlongo.
