uMthunywa
Cornelius Luphahla
LOKHU zibambe imilomo yangaphansi izakhamizi zesigabeni seJanke, eNkayi ngemva kokuba enye indoda ibanjwe xhaka emzini wayo izincindela uluju lwemvelo lomfazi womnewabo.
Lesisiga senzakale kuviki ephelileyo lapho uChristopher Moyo obanjwe khona esotha umlilo wemvelo loSilibaziso Ndlovu umkamnewabo uBenjamin Moyo kuntambama, uMthunywa ukuzwile lokhu.
Kuzwakale ukuthi uNkszn Ndlovu wayeselesikhathi eside esuka ntambama ethi uyakwejisa komakhelwane kanti uya kumnawakhe womkakhe njengoba ehlala yedwa, abesephenduka esezolala okwadala ukuthi umkakhe abelokusola. Ngemva kwalokho kubikwa waqala ukukudingisisa lokhu waze wabona kungcono ukuthi amlandele engaphuma waze wamthola elele lomnawakhe.
UMthunywa ukhulumisane loNkosazana Belinda Ncube oyisakhamuzi sakule indawo wachaza ukuthi yena wezwa sokungumsindo uMnu Moyo esesilwa lomnawakhe lomkakhe.
“Mina ngezwa sokungumsindo komakhelwane ngagijima ngaqonda khona ngathola abantu sebegcwele belamulela uChristopher owayetshaywa ngumnewabo. Ngathi ngibuza ukuthi babangani ngezwa kuthiwa uMaNdlovu ubanjwe ngumkakhe elele lomnawakhe.
“Ngemva kwalokho basuka njengomdeni bayakhulumela kosobhuku khonapho ebusuku,” kutsho uNkzn Ncube.
Esinye isakhamuzi sakule indawo esithande ukubizwa ngokuthi nguNkosazana Dube sibikele uMthunywa ukuthi sona kudala sakubona ukuthandana kukaMoyo lomka mnewabo.
“Mina ngakubona kudala ukuthi uMaNdlovu lomnawakhe womkakhe kukhona okutshaya amanzi phakathi kwabo.
Ngitsho ngoba ngangihlala ngibabona behamba bonke enkunini kanye lekukheni amanzi. Ngiyamangala nxa umka MaNdlovu ekhona ekubona khathesi,” kutsho uNkzn Dube.
UMnumzana Thabani Moyo uyisemdala wala amadoda ubikele intatheli ukuthi noma nje indaba le yenzakele kodwa sebekhulumisene njengomdeni.
“Indaba yokuganga kwabantwana ngiyayazi kodwa sikhulumisene njengomdeni sayilungisa ngoba akukuhle ukuthi abantwana bahlale bebophelane umoya. Yikho nje sithe omncane kagezise umuzi womnewabo ngenkomo ezimbili ukuze bengakhangelani kubi.
“Ekukhulumeni kwethu besingatsho ukuthi siyamgweba umntwana kodwa besisenzela ukuthi engaze walahlwa langabaphansi ngenxa yobubi abenzileyo yikho ekhiphe lembuzi yokukhulumisana labo,” kuveza uMnu Moyo.
Ebuzwa ngale indaba uMnumzana Benjamin Moyo uchaze ukuthi ngeke akubikele muntu lokhu.
“Indaba le ngeyomuzi wami ngakho ngeke ngiyibikele muntu ngoba sengiyilungisile,” kuphetha uMnu Moyo.
