uMthunywa
Johas Moyo
ZILOKHE zitshaqekile izakhamizi zakoHleki, eZhombe kulandela ukuzwa ngesihluku ebesisenziwa ngelinye inina ebelithwalise abantwabalo amagabha avuzayo ngokubalalisa labondofa bakhe obekubangela ukuthi bangendi.
Kubikwa isiga lesi senzakale kumaviki amabili aphelileyo lapho umetheswacala uNkosazana Eunice Nyathi ekhitshelwe okuyinto okuyimpande emnyama ebihlala ngaphansi kombheda wakhe okubikwa ukuthi wakuthatha eMozambique kungumuthi wenotho okwafika ngapha kwahlamuka kwaba ngundofa obelala labantwana bakhe.
Uhlawuliswe imbuzi ngenxa yemisebenzi yakhe le. UMthunywa uxoxe loNkosikazi Mthandazo Thebe oveze ukuthi kuliqiniso okuthi kulamantombazana amane asekhulile angendanga yiloba bebahle njalo befundile. Uthe amadodakazi kaNkosikazi Nyathi kawakaze aqome okuyinto ebihlala imangalisa abantu esigabeni.
Uthe bamangele uNkszn Nyathi eletha into zakhe phakathi kwabantu ethi yizo ezibangela ukuthi abantwabakhe bangendi.
“Kasilalo iqiniso ukuthi ubekwenzelani kodwa sicabanga ukuthi bekungumuthi wokunotha. Bekusimangalisa ukubona intombi ezinhle zingendi kumbe khona ukuqoma nje”, kutsho uNkkz Thebe.
Ebuzwa ngalolodaba umalume wabantwana uMnumzana uMncedisi Tshuma uveze ukuthi ulokhe engelankani ngesenzo sikadadewabo.
“Ngilokhe ngingakukholwa ukuthi udadewethu engenza ihlazo elinjalo. Kambe umuntu abelolunya lokuyadinga umuthi khonale eMozambique avale abantwana umendo ngokubalalisa londofa ngoba efuna ukunotha.
“Umkakhe kudala wamtshiya wazihambela kaziwa lapho asehlala khona kodwa uyaphila. Sikubone kuliqiliso okutshiwo ngugawula nanko phela lempande iphume yatshiswa wonke muntu ekhangele,’ kutsho uMnu Tshuma.
UMthunywa uxhumane loPriscilla Mpofu omunye wabantwana okubikwa ukuthi ubelaliswa labondofa waveza ukuthi kakwazi okukhulunywa ngakho kodwa kuliqiniso ukuthi kabendanga njalo uthando lwabo luphelela emoyeni, abafana bayakhalala ukuthandana labo.
“Kunzima kithi ukuba sethandweni okwesikhathi eside. Amajaha ayakhalala kumbe asale kungela sizatho njalo loba ungazama ukuncenga uyabe udlalisa isikhathi sakho. ” kutsho uNkszn Mpofu.
Ebuzwa ngale indaba uNkszn Nyathi uthe umuthi wakhe wawuthola eMozambique uyimpande kodwa wafika waxhwala eseyehluleke ukuthi awunike uchago njengendlela ayelaywe ngayo.
“Ngicine ngisiyakunikela otsikamutanda ukuthi bakutshise,” kutsho uMaNyathi.UMthunywa uxhumane loSobhuku uMakhotha oveze ukuthi kuliqiniso lokho okukhulunywa ngabantu njalo wazibonela ngawakhe amehlo kusenzakala.
“Kuliqiniso sibili, abantu bagangile. Sibonga ogawula ngokulungisa isigaba sethu. Abantu sebegangile impela,” kutsho uSobhuku uMakhotha.
