uMthunywa
Ethel Ncube
KUDABA oluhlasimulisa umzimba olutshiye abantu bebambe owangaphansi, kulenye indoda yeMberengwa engene ebhawa yahlahlela enye ebibukele ibhola ngehloka.
Indaba le, yenzakale ngoMvulo kuyonale iviki lapho umuyi uSibonginkosi Matavire Pisa ahlahlelwe ngehloka ekhanda wafa nguGina Mangena, ongene ebhawa ethwele ihloka wamgamula engazange awuvule umlomo.
Kuvele ukuba uPisa wayesebhawa ebukele ibhola wasesukuma eselula inyawo wama emnyango kanti uselanda ukufa.
Kubikwa wathi esamile emnyango kodwa elokhu ebukele ibhola kwathutsha umetheswacala uMangena wadobha ihloka wamhlahlela ekhanda engatshongo lutho.
Isikhulumi samapholisa esabelweni seMidlands uAssistant Inspector Fungai Ngawagare usiqinisekise isehlakalo lesi.
“UMangena esehlahlele ngehloka uPisa wawela phansi wedlula emhlabeni. Umetheswacala wacela ezinyaweni njalo lokhu engakabotshwa,” kutsho uAsst Insp Ngawagare.
Isidumbu sathwalelwa esibhedlela seMberengwa.
“Njengamapholisa sicebisa uzulu ukuthi kumele aqakathekise ukukhulumisana nxa kuthe kwaba lokungazwisisani kulokulwa kulwa,” kuphetha isikhulumi.