uMthunywa
Thokozile Mbedzi
KULENDODA yeKwibila eFort Rixon emangalise izakhamizi zakulindawo ngemva kokuba ihlahlele enye ngehloka emakhasini ngemva kokuqhamuka kwezibhakela kumdlalo lo.
Kubikwa uJoel okungasatholakalanga isibongo sakhe waqala waxabana loBrighton laye okungatholakalanga isibongo sakhe osengumuyi ngekhefu lamaqhawe, kusisa badibana njalo uJoel esexabana labanye emakhasini uBrighton wathi ezama ukubalamula uJoel wahle wamgamula wafa.
Omunye wezakhamizi zakulindawo uMnumzana Paul Sibiya uveze ukuthi kalankani ngesenzo sikaJoel ozonde ukulanyulwa wagamula umuyi uBrighton.
“Ngimadolo nzima ngesenzo sikaJoel yena ongazange athande ukuba alanyulwe nguBrighton kodwa wakhetha ukumhlamukela ukuba kungani esithi kayekele ukulwa labanye. Wathatha ihloka wamgamula phakathi kwabo bonke abantu ababekhona lapho wahle wafa.
“Kumaviki edluleyo kulomunye umfana oliTonga okubikwa waxabana laboBrighton wasebafungela ijoyi ethi nxa bengamusanga esibhedlela bazazibonela. “Manje lamuhla nanko omunye usebulele usowabo emdlalweni wabo ongalunganga, phela kuhlala kulwiwa sikhathi sonke emakhasini.
“Umfana weBinga abamlimazayo wathi evela esibhedlela wathatha isikipa sakhe esasilegazi wasifaka phakathi kwephephabheki wathi sizakuba yi-AK47 yakhe kungakho bonke abamlimazileyo bazazibonela.
“Khathesi sokuvele ukuthi bonke abalwa laluMtonga bafa ngendlela engazwisisekiyo, khathesi loBrighton laye usehambile mahlayana nje. Ngibona sokulozimu emulini lezi, nxa bengekela ukukunanzelela bazaphela,” kutsho uMnu Sibiya.
Omunye njalo oyisakhamuzi kulindawo uNkosazana Metha Moyo uveze ukuthi umuyi uBrighton ubengomunye wabafana akade sebehluphile esigabeni kunye laye umabulala.
“Umuyi uBrighton kunye loJoel ngabafana abaziwayo njalo asebehluphile esigabeni. Baziwa ngokuhlupha lapha esiqintini sakithi. Isikhathi esinengi bayageziswa emangcwabeni ngabakhulekisayo, kambe into elihlazo kangaka lake layibona ngaphi? Abantu abangahloniphi indawo lapho okulele khona asebethule. Sicine amapholisa edinga umsolwa uJoel, asazi kumbe imithandazo yakhe izamvikela.
“Ngisakhumbula kwesinye isikhathi bake badingwa ngamapholisa bacatsha amapholisa esehambile basala becupha inyawo zawo begqoke amapulasitiki ezandleni. Kusukela khonapho asizange sibone bedingwa futhi. Asazi, sizayicela ivuthiwe,” kutsho uNkszn Moyo.
Imizamo yokuthola umbiko ngalesi sehlakalo emapholiseni yehlule ngoba ucingo lwesikhulumi samapholisa esabelweni seMatabeleland South uInspector Philisani Ndebele belungangeni.
