uMthunywa
Thokozile Mbedzi
KULESALUKAZI seMkoba 16 eGweru esibulewe ngesihluku kulandela ukukhiyelwa endlini ngumzukulu kamakhelwane waso sahlahlelwa kanengi ngehloka esola ukukhuzwa.
Kubikwa uPanashe Jamari oleminyaka engu-20 obehlala loyisekazi wakhe wamane waqala ukugamula impahla lokubulala amafasitela okwenza uCharity Moyo (59) wahamba komakhelwane lo ezama ukuthi ayemkhuza kanti usebizwa yikufa.
Kubikwa uPanashe wakhiya isivalo waqala ukuhlahlela umakhelwane lo amahlandla amanengi okwenza lanxa abantu bathi sebemsiza wayevele eselimele kakubi.
Gweru Provicial Hospital
Kubikwa wathwalelwa esibhedlela seGweru Provicial Hospital lapho athi esanda kunikwa umbheda wahle wedlula.
Isikhulumi samapholisa eNkabazwe uEmmanuel Mahoko uqinisekise isehlakalo lesi.
“Sichwayisisa ngodaba lapho inina elileminyaka engu-59 elingumakhelwane elathi lizama ukukhuza umzukulu kamakhelwane wahle wamphendukela wakhiya isivalo wamhlasela okwabangela ukuthi afe esanda kunikwa umbheda esibhedlela.
“Kukhanya uPanashe kaphilanga kuhle engqondweni kungakho sixwayisa uzulu ukuthi nxa behlala labantu abanjalo babone ukuba bayathola imithi yabo ngesikhathi njalo kabekeli ukuyayithatha nxa ingaphela,” kuphetha uInsp Mahoko.
