uMthunywa
Fairness Moyana
KULENDODA yeJambezi egwetshelwe ukuyapika ejele iminyaka emine isolwa ngecala lokubangela ukugalula kwesinye isakhamuzi ngesikhathi isifundisa ukubhukutsha.Umsolwa oleminyaka yokuzalwa engu-17 ohlala kuVillage 1 ngaphansi kwenduna uShana utholakale elecala ngumantshi weHwange Regional Court uNkosikazi Dambudzo Malunga lokubangela ukufa kukaDoubt Sibanda owagalula efundiswa ukubhukutsha ngumsolwa.
Inkundla izwe ukuthi mhlaka 23 Mabasa nyakenye ngehola lesificamunwe munye ekuseni umuyi owayeleminyaka engu-24 kanye labanye abafana abebelusile ababili baqonda emadlelweni eGavu ukuyakwelusa inkomo.
Kubikwa ngemva kwemini ngehola lesithathu abathathu laba baqonda echibeni uMavemu emfuleni uGavu lapho abafica umsolwa ehlezi ekhunjini labangane bakhe ababili.
Kubikwa ngemva kwemizuzwana umsolwa labangane bakhe bangena emanzini baqala ukubhukutsha. Umsolwa wasebiza umuyi ethi kabuye abhukutshe, umuyi wala ethi kakwazi ukubhukutsha kodwa umsolwa wamncenga waze wangena emanzini.
Kuzwakale njalo ukuba sebephakathi kwamanzi baqala ukutshona kodwa umsolwa watshiya umuyi owayengakwazi ukubhukutsha egalula.
Umtshutshisi kulelicala bekunguMnumzana Tawanda Sigauke.