uMthunywa
Johas Moyo
KULENDODA yesigabe seBinga emiswe phambi kukamantshi isetheswa icala lokumithisa umlamu wayo oleminyaka elitshumi lane obehlala layo kanye lodadewabo.
Umsolwa ohlala esiqintini seNtivule esingeke sachaza ibizo lakhe ngenhloso yokuvikela umamangala kodwa oleminyaka yokuzalwa engu-35 umiswe phambi kukamantshi uAilene Munamati kuviki ephelileyo esetheswa icala lokudlwengula lokumithisa umlamu wakhe ofunda uFomu 1.
Umtshutshisi kucala leli uMnumzana Bruce Maphosa ubikele inkundla ukuthi ekuqaliseni kwenyanga kaMfumfu ngomnyaka ophelileyo umsolwa wakhombisa umlamu wakhe kwathi mhlaka 23 ngenyanga efanayo waya laye emacansini.
Inkundla izwe njalo ukuthi mhlaka 13 Mabasa umsolwa waphinda wadlwengula umamangala okwabangela ukuthi azithwale.
Kubikwa umthwalo lo waze wabonwa ngunina kamamangala ngesikhathi ekukhefu lokuvalwa kwezikolo okwenza wahle wayabikela amapholisa ngemva kokuveza ukuthi wayehlukuluzwe ngumnewabo.
Umsolwa ulivumile icala lakhe.
Umantshi ugwebe umsolwa ukuthi ayehlala ejele okwenyanga ezingu-24 wasemephulela eziyisithupha kukhangelelwe ukuthi angenzi icala elifana lalelo. Kungakho-ke umsolwa uzadonsa inyanga ezingu-18 ejele esebenza gadalala.
Umantshi ucine ngokukhuthaza abadala ukuthi bavikele abantwana hatshi ukuthi bona befane lenkukhu enatha amaqandayo.
