uMthunywa
Ethel Ncube
KWEHLE iyezi elimnyama kwenye imuli yeTurk Mine eNyathi ngemva kokuba elinye ilunga lemuli le litshaywe lafa livela khelela umagwebu.
Isehlakalo lesi senzakale ngoMvulo kuyonale iviki lapho, uMthandazo Moyo oleminyaka engu-22 yokuzalwa ehambe ezitolo zeTurk Mine esiyanatha lomngane wakhe, uNkululeko Ndlovu oleminyaka engu-28 yokuzalwa.
Kubikwa uNdlovu wasuka wabuyela ngakibo watshiya uMoyo elokhu ezinathela ezitolo labanye abangane bakhe andubana ngelanga elilandelayo watholakala esefile egangeni duze lomgodi lapho okwenjiwa khona igolide egwazwe ikhanda lezandla njalo kwezinye indawo amathambo esegcekeni.
Omele isikhulumi samapholisa esabelweni seMatabeleland North uInspector Namatirayi Mashona uthe amapholisa eNyathi achwayisisa ngodaba lwendoda etholakale ifile njalo ilamanxeba.
“Indaba le isifikile endlebeni zethu sidinga uncedo kuzulu nxa ekhona ololwazi ngendoda ebizwa ngokuthi ngu-Anele.
Sifisa ukukhuluma lendoda le, sicela ongabe embonile azise amapholisa aseduzane layo,” kubika uInsp Mashona.
