uMthunywa
Thokozile Mbedzi
KUBE yisiphithiphithi endaweni yamabhizimusi yeSunset eGokwe ngemva kokuba enye indoda ibulele enye ngeviki ephelileyo kulwelwa umakhalekhukhwini.
Kubikwa uJemias Mapolisa oleminyaka engu-38, wesigabeni seMasvina ngaphansi kwenduna uNemangwe eGokwe obehamba lentombi yakhe sebetshayisile emsebenzini bahlangana lendoda ebivale ubuso yahluthuna umakhalekhukhwini wentombi yakhe.
U-Inspector Emmanuel Mahoko uthe kulendoda egwazwe yafa ngesikhathi isilwa lenye kubangwa umakhalekhukhwini.
“UJemias ugwazwe wafa ngemva kokuba ehlangane lendoda ebizivale ubuso yahluthunela intombi yakhe umakhalekhukhwini.
“Lokhu akuzange kumphathe kuhle uMapolisa ngoba wazama ukulwisana laleyo ndoda ukuze itshiye umakhalekhukhwini eyayisimhluthunile.
“Ekulwisaneni kwabo intombi le yasibona ukuba akusamanga kuhle yabaleka ibuyela njalo endaweni yamabhizimusi lapho eyafika idinga ukuba icatshe.
“Mhlaka 23 Mabasa ngehola lakuqala ekuseni ababesedlula bevela ebhawa bathola uMapolisa ethe daca phansi ephakathi kwechibi legazi.
Udaba lolu lwabikelwa amapholisa athi ehlola isidumbu athola silamanxeba amanengi.
“Njengamapholisa sicela uzulu ongabe elolwazi azise amapholisa aseduzane laye ukuze indoda le ifinyelelwe ngabomthetho.
“Siyazi uzulu uzaphathisana lamapholisa ukuze isigelekeqe lesi sibanjwe sijeziswe,” kuphetha uInsp Mahoko.