uMthunywa
Thokozile Mbedzi
KULENDODA yakuVillage 4 eMuzhanjire eMwenezi emangalise abantu ngosuku lweKhisimusi kulandela ukubulala umzawayo kubangwa inkomitsho.
Umetheswacala uTavanwenye Chamana oleminyaka engu-42 yokuzalwa kubikwa ugwaze umzawakhe uBrighton Zhou oleminyaka engu-33 ethi kungani eboleke inkomitsho emzini wakhe engekho.
Ekhuluma lentatheli kaMthunywa uMnumzana Talent Moyo uthe njengezakhamizi balokhu bethukile ngesenzo sikaChamana obulele umzawakhe kubangwa inkomitsho.
“UZhou labafowabo basuka baqonda koMupasi bethwele isigubhu se-5 litres sotshwala ekufikeni kwabo bathola utshwala bungakabilisisi basebecabanga ukuthi babe benatha ababelabo belinde ukuthi bubile.
“Amadoda la ananzelela ukuthi kala nkomitsho yokunathisa basebesiya koChamana lapho abafica unkosikazi wakhe wabanika inkomitsho.
“UChamana uthe efika unkosikazi wakhe wasembikela ukuba umzawakhe ucele inkomitsho wazonda wagana unwabu waphuma ngesiqubu esiya lapho ababekhona wafika wathi ufuna inkomitsho yakhe yena wala,” kutsho uMoyo.
Kubikwa uZhou eseyale lenkomitsho uChamana wahle wakhipha ingqamu wamgwaza ngaphansi kwehlombe lesandleni sokudla loba wazama ukubaleka kodwa kwamkhulela wawela phansi wedlula emhlabeni.
Isikhulumi samapholisa eMasvingo uInspector Kudakwashe Dewa ebuzwa ngodaba lolu uvumile wathi solufikile ehofisini yabo.
“Udaba lwendoda egwaze eyinye kubangwa inkomitsho solufikile ehofisini yethu.
“Sikhuthaza uzulu ukuba engabosebenzisa udlame nxa bexazulula inkinga abahlangana lazo ukuze kungabi lokulahleka kwempilo,” kuphetha uInsp Dewa.
