uMthunywa
Arnold Ndlovu
KULESISEBENZI seTjewondo eMatopo esimangalise izakhamizi ngemva kokutshontsha esitolo asebenza kusao andubana ajumeke khonapho.
UMethembe Dube kubikwa utshontshe esitolo lapho akade esebenza khona wanatha utshwala waze wadakwa. Kusuke kwaba nzima ukuthi asuke lapho esitolo khepha uhle wajumeka waze watholakala phakathi esitolo ngelilandelayo.
Ekhuluma lephephandaba likazulu uMnumzana Steven Ndlovu uveze ukuthi uDube bekungakhangelelwanga ukuthi enze ukuganga lokhu ngoba engumuntu obekhanya ethembekile.
“Kusimangazile lokhu akwenzileyo ngoba uDube lo ngumuntu ohlonitshwayo esigabeni njalo ukutshontsha kwakhe utshwala lokhu kuyikuzehlisela isithunzi nje emphakathini, kambe aze atholakale elele eceleni kwakhe kulama-scuds angu 4 lezipatalala ezimbili.
“Umuntu shuwa sengaze athande utshwala aze abuvukele ebusuku ukuthi ayebutshontsha lapho asebenza khona, sokulezikhathi ezinengi yena ehlala ekhala ukuthi esitolo kuyatshontshwa phose maviki onke kodwa kungazake kubanjwe muntu. Sekuvelile khathesi ukuthi isela nguye mathupha,” kuveza uMnu Ndlovu.
Iphephandaba likaMthunywa lizamile ukukhulumisana loMnumzana Dube wathi akwenzayo kwabaliphutha kodwa sowakhulumisana lomnikazi wesitolo baxolelana.
“Ngiyakwazi ukuthi engakwenzayo akulunganga sibili, kwabaliphutha ngoba ngingumuntu othembekileyo kumnini wesitolo kodwa sesakhulumisana ngathembisa ukuthi ngizambhadala utshwala engabunathayo.
Intatheli iphinde yakhulumisana lomnini wesitolo lesi uMnu Daniel Sibanda othe waphoxeka kakhulu ngesenzo sikaDube.
‘Mina okwenziwa nguDube kwangiphoxa kakhulu ngoba bengimethemba kodwa yena wakhetha ukungitshontshela. Ngahle ngamxotsha ngathi abhadale imali yotshwala abutshontshayo,” kuphetha uSibanda.
