uMthunywa
Ethel Ncube
NGENXA yobuhwaba kulendoda yeSt Paul’s eLupane etshaye umkayo ngomphika ekhanda izondele ukuthi umncitshe umsobho.
UMnumzana Tholisani Ndiweni uvuke ubhova wagongoda umkakhe, uNkosazana Selina Mwembe ngembiza ekhanda kuviki ephelileyo ngoba emncitshe umsobho wenyama.
UNkosazana Nothabo Ndiweni olilunga lemuli ubikele uMthunywa ukuthi isenzo somnewabo sibamangalisile.
“Obunye ubuhwaba bunzima mpela, umnewethu utshaye umkakhe ngoba efuna umsobho kuphela hatshi lenyama, isobho nje.
“Ngibizwe ngumalukazana ethi ngizobona imihlolo ngathi ngifika wangitshengisa imbiza atshaywe ngayo ekhanda.
“Ngithe ngimbuza ukuthi ubengeke alinde yini bamphekele enye nxa ubesola lokhu akuphiweyo wangitshela ukuba ezababili azingenwa umuntu uyaqondiswa kodwa okusegcekeni yikuthi umnewethu ligovu, akukho okunye,” kubika uNkszn Ndiweni.
Uqhubekele phambili eveza ukuthi umnewabo wehlukana lonkosikazi wakuqala ngoba emtshaya ethi ukhuma itshukela.
“Usethatha isibili ngenxa yobuhwaba bakhe owakuqala laye wajikijelwa ngetipoti kuthiwa uqeda itshukela kabuyele kibo. Lamuhla nanko usephindile ethi yindaba efakelwe umsobho omlutshwane lokhu yikungakhuli sibili,” kutsho uNkszn Ndiweni.
UMthunywa uxhumane loNkosazana Selina Mwembe onguye owatshaywa ngomphika.
“Kanti okutshelileyo kungani engakuchazelanga konke. Okomuzi wami akudingi muntu waphandle kulungiswa ngabemuli kuphela. Umphika wadlula ekhanda kodwa awungilimazanga, okomsobho lokhu akufuni mina, kuyangisinda,” kuveza uNkszn Mwembe.
Ekhuluma lentatheli uMnumzana Tholisani Ndiweni onguye owananka umkakhe uvumile ukuba wamtshaya.
“Angisilogovu kodwa umfazi nxa ephambanisa uyaqondiswa ukuze angaphambuki. Indoda kumele iphiwe lomhluzi nxa kudliwa inyama hatshi ukuncitshwa. Lingangixabanisi lomkami ngokungiloba emaphepheni enu,” kuphetha uMnu Ndiweni.
