uMthunywa
KULOGOGO oleminyaka yokuzalwa engu-57 ohlala eBuhera okubikwa utshaye umzukulu wakhe waze wabhubha, ethi kungani ethambisile engutsheni.
Isehlakalo lesi senzakale ngoMvulo ngeviki ephelileyo lapho uVenganai Tambudzai ejezisa abazukulu bakhe abangamaphahla.
Elinye iphahla kubikwa lisesibhedlela.
Unina wabantwana uGracious Mukandadzviti oleminyaka yokuzalwa engu-22 ohlala eHarare uthe amaphahla akhe abehlala lomama ozala uyise wabantwana laba.
Uthe yena lobaba wabantwana sebehlukana njalo ubaba wabantwana uGeorge Dhlamini wambikela ukuthi abantwana abezwa kuhle balamathuthuva.
“Ngelanga elilandelayo uGeorge wangibikela ukuthi omunye umntwana ongumfana kasekho emhlabeni,” utsho njalo.
UGracious uthe ugogo wabantwana lo vele ubengabaphathanga kuhle abantwana.
“UBlessing (iphahla elilokhe lisaphila) wangitshela ukuthi ugogo wabatshayela ukuthambisa engutsheni.
“Ngathi ngifika eMurambinda, lo owayengumamazala wami waqaleka waqala ukukhala kodwa ngiyazi ukuthi lezo zaziyinyembezi zamanga.
“Wakhuluma kulabodokotela eMurambinda General Hospital ukuthi nguye otshaye abantwana kabuhlungu ngoba odokotela basebethe bafuna i-police report bengakelaphi uBlessing.
Murambinda General Hospital
“Wancenga ukuthi singcwabe umntwana singabikelanga amapholisa,” kutsho uMukandadzviti.
Wengezelele wathi: “Ngidabukile ukuba ugogo wabantwana watshela amapholisa amanga ethi umntwana ubulewe yindingindi kanye lamathuthuva.
“Waxolisa kimi ngoba wabeletha isidumbu sikaBlessed esuka eBuhera Centre waze wayafika emotsha yeMurambinda, thina engasibikelanga.
“Umntwana wabhabhulwa efile bakithi, kusukela eBuhera Centre waze wayafika laye eMurambinda.
“Ngangizigcinela abantwabami ngihlala labo uyise wacela ukuthi baze kibo.
“Ekuqaleni ngala kodwa ngasengivuma ukuthi abathathe ngoZibandlela lonyaka,” utsho njalo.
Uthe yonke into ibikhanya ilungile nje lapho ekhuluma logogo labantwana kumakhalekhukhwini.
Uyise wabantwana, uDhlamini uthe balindele ukuba isidumbu sihlolwe besebebeka umntwana.
“Ngizwa ubuhlungu obukhulu, kunzima bandla.
“Umama usetheswe icala lokutshaya njalo elinye icala lokufa kukaBlessed lisacubungulwa, sisalinde impumela yokuhlolwa kwesidumbu.”
