uMthunywa
Listen Ndlovu
KUFE indoda eleminyaka yokuzalwa engu-28 iganyulwe ngehloka ekhanda kubangwa umfazi.
Kubikwa mhlaka 2 Nhlangula ngehola lika-11 ebusuku, izelamani uTrymore oleminyaka yokuzalwa engu-28 loSimon Mpofu oleminyaka yokuzalwa engu-20, abahlala esigabeni seMurairwa eGokwe ngaphansi kwenduna uChireya balanda uJohn Kufa oleminyaka engu-42 owayelele emzini wakhe.
Kubikwa ekufikeni kwabo emzini kaJohn babehlomile bethwele amabhemba, bembeka icala lokuthi uthandana lomka-Trymore.
Bangena ngenkani endlini yokulala lapho uJohn ayelele khona lonkosikazi wakhe.
UTrymore watshaya unkosikazi kaJohn uZorodzai Paanosvitsa ngebhemba esandleni sokudla.
Esephindisela uJohn wadobha ihloka wasegamula uTrymore ekhanda kanye wahle wafela khonapho.
Isikhulumi samapholisa eMidlands uInspector Emmanuel Mahoko uthe amapholisa achwayisisa ngecala lokubulawa kwendoda eleminyaka engu-28 yeGokwe.
“Sidingisisa ngokubulawa kwendoda yeGokwe eleminyaka engu-28, umetheswacala usezandleni zamapholisa njalo uyawasiza ekuchwayisisweni kwalelicala.
“Amapholisa axwayisa umphakathi ukuba uxazulule ukungazwisisani ngokukhulumisana.
Kwakungaba yikuhlakanipha ukuthi bathole ongaba lamula,” kutsho uInsp Mahoko.
