uMthunywa
Cornelius Luphahla
ZIDIDEKILE njalo zithithibele izakhamizi zelokitshini leMzilikazi kuG Square ngemva kokuba elinye inina lakule indawo ligamule isihlahla ebesisegumeni lelinye ixhegu qede ixhegu laqaleka lafa.
Insumansumane le yenzakale ngoLwesine kuviki ephelileyo lapho uNkosazana Prisca Nyoni othumele uMnumzana Elijah Mayela ukuthi agamule isihlahla se-avocado ebesisegumeni likaMnumzana Phiri okudale ukuthi afe ngemva kokuwa kwalesisihlahla.
Kuzwakale ukuthi umuyi loNkszn Nyoni bangomakhelwane ngakho isihlahla sasithintithela amahlamvu aso egumeni lakhe oyikho okwadala ukuthi athumele uMayela ukuba asigamule.
UMthunywa ukhulumisane loNkszn Prisca Dube oyisakhamuzi sakule indawo walandisa ngokufa kukamuyi esola uNkszn Nyoni ukuthi kungani wagamula isihlahla lesi.
“UMaNyoni wayehlala ethi ufuna ukugamula isihlahla sikaPhiri ngoba simngcolisela iguma lakhe ngokuthintithela amahlamvu njengoba sasigobele khona. Ngokunjalo uPhiri wayesala ukuthi asigamule ethi kamelele sivuthwe ngoba silezithelo njalo kukhona afuna ukusenza khona.
“Okwangimangalisayo yikuthi kuthe ngoLwesine emini ngesikhathi uPhiri engekho uMaNyoni wabiza uMayela wafika wasigamula sawa. UPhiri wathi efika wathola isihlahla sakhe sesiganyuliwe wamangala wahle wawela phansi bamthwalela esibhedlela seMpilo wafika wabhubha ngalelolanga,” kulandisa uNkszn Dube.
Ekhuluma lentatheli omunye wezakhamizi zakule indawo oziveze ngokuthi nguBanda uthe umuyi loNkszn Nyoni babezwana kakhulu ngakho uyamangala ukuthi kuhambe njani.
“UPhiri loMaNyoni babephilisana kuhle kakhulu ngoba lokudla wayemupha njengoba nje ubesengumuntu omdala engasenelisi ukuziphekela. Ngalokhu ngiyamangala ukuthi kuhambe njani aze agamule isihlahla lesi njengoba kade bengomakhelwane abazwisisanayo,” kuchaza uMnu Banda.
Ebuzwa ngale indaba uNkszn Nyoni uthe ngeke akhulume lutho ngoba usakhala njalo wayengazi ukuthi uPhiri engabulawa yikuganyulwa kwesihlahla.
“Mina ngeke ngikhulume lutho ngendaba le ngoba ngisakhala njalo ngangingazi ukuthi uPhiri engabulawa yikuganyulwa kwesihlahla,” kuphetha uNkszn Nyoni.
