uMthunywa
Thokozile Mbedzi
KULEJAHA elileminyaka yokuzalwa engu-19 elihlala ngaphansi kwenduna uJahana eligalule lafa ngeviki ephelileyo lithiya inhlanzi.
Umuyi uAmon Musatinah ugalule edamu leMpawani kumfula uFort Rixon ngesikhathi ethiya inhlanzi ekuseni ngehola lesine.
Omunye umakhelwane uMnumzana Sabelo Nyoni ekhuluma lentatheli uthe lokhu belesithuli ngesehlakalo lesi.
“Kukhanya uAmon wavuka waqonda edamu njengensukwini esiyathiya inhlanzi. Akulamuntu okwaziyo ukuthi kwahamba njani ngoba wayehambe yedwa mhlalokho.
“Uyise uMnumzana Nicholas Siziba wathi esesiyamkhangela wathola kulomambule umfana engekho. Yikho ukuyatshela omakhelwane ukuba ujaha wakhe kamboni njalo ufike emfuleni wamswela.
“Izakhamizi zasukumela phezulu zayamdinga zamthola ephakathi kwamanzi egalule,” kulandisa uMnu Nyoni.
Isikhulumi samapholisa esabelweni seMatabeleland South uAssistant Inspector Thabani Mkhwananzi ebuzwa ngodaba lolu uvumile wathi solufikile ehofisini yabo.
“Udaba lwejaha eligalule lithiya inhlanzi solufikile ehofisini yethu ngakho sithanda ukuxwayisa uzulu ukuthi angayi emadamu angavikelekanga.
“Sikhuthaza abantu ukuthi kumele balandele indlela zokuzivikela njalo babe lempahla eyokusebenzisa efana lama-life-saving jackets ukuze singalahlekelwa yimpilo mahlayana nje,” kuphetha uAsst Insp Mkhwananzi.
