Uncategorized

Ufulathela umuzi owagqibela inja ephilayo

05 Sep, 2019 - 00:09 0 Views
Ufulathela umuzi owagqibela inja ephilayo

uMthunywa

Bongani Ndlovu

IVUKE itshiye phansi konke okungokwayo kanye lomuzi wayo indoda yeMlotheni eTsholotsho ngemva kokuba ixwayiswe ukuba igebhe inja eyayingcwaba iphila ngoNkwenkwezi walonyaka.

Intatheli kaMthunywa izwe ukuba ngemva kokudindisa amaphepha okuba inja iyegejwa emapholiseni kanye lasemthethwandabeni induna yathuma osobhuko bayo ukuthi bayenika uMnumzana Ndaniso Ndlovu amaphepha ayemxwayisa ukuba kumele agebhe leyo nja.

Amaphepha la ayeveza njalo ukuthi abantwana bakaMnu Ndlovu balecala lokuhlukumeza inyamazana.
Ikhuluma lentatheli induna uGampu ibike ukuba isigaba besilokhe singahlalisekanga ngaleso sehlakalo kungakho wenza imizamo yokuthi igejwe.

“Abantu esigabeni basala bengahlalisekanga esigabeni abanye belokho besiba lembuzo lembono eyehlukeneyo ngaleso sehlakalo sakoNdlovu kungakho njengenduna ngenza imizamo yokuba umthetho ungenele ikhitshwe leyo nja ethuneni ingcwatshwe yodwa,” kuchaza induna uGampu.

Iqhubekele phambili yaveza ukuba ngesikhathi isipha osobhuko bayo amaphepha uNdlovu wayekhona emzini wakhe.

“Nganika osobhuko amaphepha okugejwa kwenja ngoLwesine ukuba behambe beyenika uNdaniso Ndlovu kodwa ngoMgqibelo lapho sesihamba ukuba ayegebha inja samthola engekho endlini umkakhe labantwana besithi bacabanga ukuba uye eGoli,” kuveza induna uGampu.

Induna uGampu iqhubekele phambili yathi ayisikho kokuqala ukubaleka kukaNdlovu.

“Akusikho kokuqala lokho ukubaleka kwakhe uNdlovu ngoba uke wabalekela eSouth Africa ngoNtulikazi lapho kuqalisa indaba yokugejwa kwayo inja,”

“Thina kungumlandu wethu ukuthi inja leyo iphume iyengcwatshwa kuhle yodwa, kodwa akusindawo yethu ukuba sivule ithuna ingakho besicele yena umnikazi walo kodwa wabeleka okungangokuthi akafuni kudutshukelwa yilokho abakufaka phansi ethuneni,” kuphetha induna uGampu.

Share This:

Sponsored Links