uMthunywa
YiNtatheli kaMthunywa
KULENDODA yeChegutu eyetheswa icala lokubulala umkayo kubangwa inkukhu.
Indoda le, uManjengwa kubikwa wabulala unkosikazi wakhe, uBeauty Sando ngoZibandlela ngomnyaka ka2020 kuPlot 1 eSavannah, Chikari eChegutu.
Umtshutshisi kulelicala uthe, uManjengwa walaya umufi ukuba anike uSheperd Tauro inkukhu njengesipho sokumhalalisela emtshwadweni wakhe.
Kubikwa uSando wala ukwenza njengokulaywa kwakhe, waphuma wahamba.
Inkundla izwe ukuthi uManjengwa walandela unkosikazi wakhe emncenga ethi kaphenduke endlini kodwa wala okuyikho okwazondisa uManjengwa.
UManjengwa kubikwa watshaya umufi kanye ngempama ebusweni andubana agamule uswazi esihlahleni amtshaye ngalo ebusweni.
USando wawela phansi ngeqolo, kodwa umsolwa waqhubeka elokhu emtshaya waze waquleka.
USando wagijinyiselwa ekilinika andubana adluliselwe eKadoma Hospital lapho ababikelwa ukuba usedlule emhlabeni besanda kufika mhlaka 3 Zibandlela.
eKadoma Hospital
Umbiko we-post mortem uveze ukuba uSando wabulawa yi-intracranial hypertension lokulima kakhulu ekhanda.
UMehluli esethula isigwebo uqale walalela izikhalazo zikaMunjengwa obike ukuba nguye umzali osesele labantwana abane omncane eleminyaka eyisikhombisa.
Inkantolo ithole njalo ukuba uManjengwa wahlawula ezihlobeni zikankosikazi ngezifuyo ezingu-14 leUS$800.
“Lokhu kutshengisa ukuzisola yikho wahlawula ngoba esazi ukuba akwenzileyo akulunganga.
Ngokuchaza kukamtshutshisi, umsolwa wayengahlosanga ukubulala unkosikazi wakhe. Indlela amtshaya ngayo loswazi bekungasoke kudale umonakalo omkhulu aluba umufi kawanga.
“Loba kunjalo kumele umphakathi ukwazi ukuthi udlame alufuneki emphakathini ngoba kwakungamelanga amtshayele ukwala ukunika isethekeli inkukhu.
Umehluli ugwebe uManjengwa iminyaka emithathu engakasusi owodwa kukhangelelwe ukuba aziphathe kuhle.
