uMthunywa
Thokozile Mbedzi
ZILOKHE zitshwaqe imizimba izakhamizi zesigabeni seSiyoka eBeitbridge ngemva kokuba enye indoda igwaze eyinye yafa kubangwa ukuthi kayikwazi ukukhombisa ngeSonto eledluleyo.
Kubikwa uShelton Mleya oleminyaka engu-29 yokuzalwa ugwaze uGodknows Sibanda oleminyaka engu-23 ngemva kokuba bexabane ngokuthi omunye ukhombisa amankazana afunwa ngomunye.
Ekhuluma lentatheli kaMthunywa uMnumzana Kholwani Ndou uthe balokhe bemangele ngesizatho sokufa kukaSibanda.
“Ababili laba babevela endaweni yamabhizimusi yeSiyoka Business centre sebebuyela ngemakhaya. Bathe besendleleni sebechaphe umfula uMtshabezi sebelanda isikolo seMajini Primary uMleya wasebuza uSibanda ukuthi kungani ehlala ekhombisa amankazana awafunayo.
“USibanda kukhanya waphendula engagqize qhakala ethi amankazana kufanele ukuthi amkhombe ngoba uyakwazi ukukhombisa.
Lokhu kukhanya akuzange kumpathe kuhle uShelton wahle wakhupha ingqamu esikhwameni wagwaza uGodknows wamtshiya ethe daca emgwaqweni eceleni kwesikolo wadliwa ngumnyama.
Kubikwa uSibanda waze wancedwa ngabanye abathutshayo bamthwalela ekilinika yeMajini lapho athi efika wadluliselwa eBeitbridge Hospital, lakho bamdlulisela koBulawayo esibhedlela seMpilo lapho athi efika ngokuswelakala kwenhlanhla wedlula emhlabeni.
Isikhulumi samapholisa esabelweni seMatabeleland South uAssitant lnspector Stanford Mguni uthe udaba lwendoda egwaze eyinye kumbango wamankazana sebelwamukele njalo basaluchwayisisa.
“Sibophe indoda okuthiwa nguShelton Mleya eMfelandawonye eBeitbridge ngecala lokugwaza. Samukela umbiko wokuba uMleya ugwaze omunye kubangwa ukuthi omunye kakwazi ukukhombisa bevela endaweni yamabhizimusi mhlaka 10 ntambama.
“UMleya esegwaze uSibanda wabaleka, kodwa kwaba labambonayo bamthwalela ekilinika kodwa wadluliselwa esibhedlela seMpilo lapho afela khona mhlaka 11.
“Uzulu ukhuthazwa ukuba engafaki umthetho ezandleni zakhe nxa kube lengxabano kababikele abaphathi bezigaba, amapholisa loba ababona ngokuhlalisana emakhaya ukuze singalahlekelwa yimpilo mahlayana,” kuphetha uAsst lnsp Mguni.
