uMthunywa
Ethel Ncube
ZILOKHU zikhakhamele izakhamizi zeTshabalala koBulawayo ngemva kokuba enye indoda igwazwe yedlula emhlabeni kubangwa isitshwala seUS$1 uMthunywa uyakuveza lokhu lamhlanje.
Isiga lesi senzakale ngeKhisimusi lapho uMusateta Rutayi oleminyaka engu-34 yokuzalwa axabane loKundai Moyo kubangwa ukuthi kabhadalanga isitshwala asithengileyo.
UMthunywa uxhumane lesinye isakhamuzi sakule indawo uMnumzana Joram Ndlovu obike ukuba balusizi ngesehlakalo lesi.
“Kubuhlungu ukuba kulahleke umphefumulo kubangwa imali encane kangaka. Bekunani ukuthi kuthiwe agezise izimbiza kumbe ahanjiswe emapholiseni nxa ebesala ukubhadala kulokuthi afe kabuhlungu efela isitshwala.
“Umuntu wafika ezokudla omama abaphekayo bathi kabhadalanga bafonela umnikazi wezitshwala yena owabuya watshaya uRutayi wacina emgwaza okuyinto ebingakhulunywa kwedlule kungalahlekanga umphefumulo,” kubika uMnu Ndlovu.
Intatheli ixhumane lesikhulumi samapholisa koBulawayo uInspector Abednico Ncube oveze ukuba udaba olunjalo balutholile.
“Samukele umbiko wendoda efe ngemva kokugwazwa kubangwa imali yesitshwala. Sikhuthaza uzulu ukuba ayekele udlame njalo kabadinge indlela ezingcono zokuqeda ukungazwisisani,” kuphetha uInsp Ncube.