uMthunywa
Intatheli kaMthunywa
INDODA yakoGutu eMasvingo okubikwa ukuba kusukela ngomnyaka ophelileyo ibikhonkotha njengenja ngemva kokuba itshontshe inja kubikwa ibhubhe ngenyanga ephelileyo.
UPeterson Chamutengure, wesigabeni seChimutando ngaphansi kwenduna uChitsa, kubikwa watshontsha inja kuleyondawo njalo kucatshangelwa ukuba walungiswa ngemithi waqala ukukhonkotha njengenja.
Umngane wendoda le, uMunyaradzi Marange oleminyaka yokuzalwa engu-32 oyakhelane lemuli le, ubikele intatheli ukuba omunye wabo ubhubhe esekhonkotha njengenja.
“Mina ngingumakhelwane kaChamutengure lo ngomnyaka ophelileyo abuya emzini wakhe lenja okucatshangelwa ukuthi wayeyitshontshile. Abanikazi benja bayidinga bayibona emzini wakhe bathi bafuna ukubhadalwa ngenkomo ezingu-15 lezo ehluleka ukuzikhipha.
“Kulapho aqala khona ukuphila njengenja eselala phandle,” kutsho uMarange. Uthe umkhuhlane wendoda le wala ukhula wacina sesiba lezilonda njengalokhu okwenza inja.
“Indaba le ibuhlungu, indoda le icine isifa sambeka khonapha ekhaya. Kodwa akuzange kuhambe kuhle emulini yakhe, unkosikazi wakhe labantwana bacina besiya kibo eTsholotsho.
“Sikhuluma nje emzini lo akulabantu kodwa indaba le yasala ezandleni zikasobhuku lamakhosi njengoba abatshotshelwa inja bala besithi bafuna inkomo ezingu-15 ezivela ezihlotsheni zendoda le,” kutsho uMarange. Kubikwa indoda le itshiye abantwana ababili omunye ukubanga lesihlanu esikolo.
“Lapha kwasala esinye isihlobo sendoda le, onguye okwaziyo ukuba udadewabo labantwana bayangaphi. Indaba enkulu ngeyokuthi abantwana bendoda le abalalutho olubambekayo, kwezinye izikhathi engabe wenziwa ludubo ukuthi atshontshe inja ukuze adinge okungamphilisa loba ayithengise.
“Umuntu owalungisa indoda le akazakali, kungabe kusaziwa yilabo okubikwa wabatshontshela inja,” kutsho uMarange. Uthi kulabantu abanengi abamtshayela ucingo abafuna ukubancedisa ngemali kumbe belaphise indoda le ngoba bengazi ukuthi seyabhubha.
“Abantu laba ngibatshela ukuba umuntu abamdingayo sewabhubha samngcwaba njalo ucingo ayelusebenzisa ngolwami. Yena wayengelacingo kanye lonkosikazi wakhe,” kutsho uMarange.
