uMthunywa
Yintatheli kaMthunywa
ZIBUKELE ibhayisikopo yamahala izakhamizi zeSinangeni, eKwekwe ngemva kokuba enye indoda engumkokheli webandla leSabatha ihudulane lenkalakatha yesaka kanye le-briefcase ilwisana lezinto zayo okubikwa ibisiya zinikela kubotsikamtanda ngemva kokuba seziyithwalise amagabha avuzayo njalo seziyiqedele inotho yonke.
Isiga lesi esilokhe sisegudwini senzakale kuviki ephelileyo lapho uMnumzana Sizondo Ndlovu ongumkhokheli webandla leSabatha esigabeni ehambe wayazinikela kubotsikamtanda ukuthi batshise izinto zakhe ngoba sezimthwalise amagabha avuzayo njalo eselala evule ilihlo elilodwa esesaba ukuthi zingamhinahina ebusuku.
Intatheli ibikelwe nguNkosazana Siphethokuhle Mhlanga ukuthi UMnu Ndlovu wavuka empondozankomo wabopha inqola kodwa kwaze kwasa elokhe elwisana lamasaka akhe okuyizinto kusala ukungena emasakeni kanye lokugada enqoleni.
“Savuswa ngumsindo wenkomo zibongolela okwasethusayo njengezakhamizi lathi sabona ukuthi kukhona ezikubonayo. Sagijimela emzini kaNdlovu singanxuswanga kumcimbi wokuvaleliswa kwezinto lezo ezazisala ukuhamba kukanti umnikazi wayeseginqe esemanzi te njalo elolaka kutshengisa ukuthi kulento alwisana layo esakeni laku-briefcase izakhamizi ezacabangela ukuthi kungaba yinyoka kumbe imbulumakhasane,” kutsho uNkksn Mhlanga.
UMthunywa uxhumane loMthokozisi Ndlovu ongumakhelwane kaNdlovu waveza ukuthi wayekhangele konke kusenzakala njalo ulokhe elala esethuka ngezinto azibonayo. Uthe kucatshangelwa ukuthi izinto zakhe bezivala izulu, zimgulisela labantwana kukanti abane sebafa bengagulanga kuminyaka esanda kwedlula.
UMthunywa uxhumane lomele usobhuku uMnumzana Elliot Moyo ovumileyo ukuthi uyizwile indaba kaNdlovu njalo lokho akumangalisi ngoba banengi abahambise izinto zabo ebesezibahluphile.
“Kuliqiniso ukuthi kuloMdala webandla leSabatha obonakele ehambisa izinto zakhe kubo tsikamutanda. Banengi abakwenzileyo lokhu njalo sithemba isigaba sizaqala ukuphumelela ngoba lokhu ngokunye obekuvala izulu esigabeni,” kutsho uMnu Moyo.
Ebuzwa ngaloludaba umetheswacala wale wemba phansi ukuthi kulendaba enjalo eyenzakalayo wakhwaza ethi indaba zomuzi wakhe kazingeni kumaphephandaba.
“Wena ungubani njalo watshelwa ngubani ngendaba zomuzi wami? Okomuzi wami kuphelela kimi njalo kangidingi kuchasisela abantu bamaphephandaba abadinga indaba zabantu ezingelani labo.
“Tshiyana lendaba ezingayisizo zakho,” kukhwaza umetheswacala.
