uMthunywa
Thokozile Mbedzi
KULENINA leBellevue koBulawayo elisezandleni zamapholisa kulandela ukudubula umzukulu walo oleminyaka engu-58 ngombhobho.
Umetheswacala uHayatt Jacqueline oleminyaka engu-51 yokuzalwa kubikwa udubule umzukulu wakhe ngehola lika-9 ebusuku mhlaka 6 Mpandula.
Kuzwakale ukuba ngalelolanga uHayatt wayehlezi eziphumulele ephethe umbhobho lo owaziwa ngokuthi yi-revolver.
Kubikwa ngephutha wasedubula umzukulu wakhe.
Ekhuluma lentatheli kaMthunywa uNkosazana Sithabile Nkomo uthe lokhe belesithuli ngokwenzakeleyo.
“Kasilamlomo ngokwenzakeleyo. Thina sethuswe yikudubuka kombhobho. Besisithi mhlawumbe sebengenelwe yizigebenga kanti ngitsho nguJacqueline owudubulileyo.
“Isimanga yikuthi kabazange bahlabe umkhosi futhi kabazange batshele muntu ngakho,” kulandisa uNkszn Nkomo.
Isikhulumi samapholisa koBulawayo uInspector Abednico ebuzwa ngodaba lolu uluqinisekisile loludaba.
uInspector Abednico Ncube
“Udaba lwenina elidubule umzukulu walo solufikile ehofisini lethu ngakho amapholisa abophe uHayatt Jacqueline odubule umzukulu ngombhobho ngesikhathi etshengisa udadewabo ovela e-United Kingdom umbhobho wohlobo lwe-revolver.
“Lokhu kwenzakale mhlaka 6 Mpandula kodwa kabazange babikele amapholisa saze samukela ucingo luvela komunye umakhelwane mhlaka 8 belokhu bengakabikeli amapholisa.
“Sesithole udletshana amapholisa afica umzukulu elenxeba lokudutshulwa. Amapholisa aphenyisisa kwavela ukuba umbhobho lo wawungokayise omdala kametheswacala kungakho ubemtshengisa ngoba efuna ukuwusa emapholiseni.
“Amapholisa athola umbhobho wohlobo lwe-revolver endlini yokuphumulela oyiwo okwadutshulwa ngawo umzukulu. Eduzane kwalumbhobho kwakule-shotgun engela serial number lenhlamvu, le-pellet gun lomunye okungatholakalanga ukuthi ngumhlobo bani owawusendlini yokulala, yahle yathathwa ngamapholisa,” kulandisa uInsp Ncube.
Uphinde waxwayisa uzulu ukuthi kathathe lelithuba lapho amapholisa amukela khona imibhobho yonke engabhaliswanga ayise emapholiseni.
“Sixwayisa labo abangabe belemibhobho, kungabe kungeyezihlobo esezedlulayo emhlabeni loba eminye engabhaliswanga ukuthi bathathe lelithuba bayise emapholiseni njengoba ingasenzi imisebenzi eyayidingelwayo.
“Sixwayisa njalo uzulu ukuba ananzelele nxa ephatha izikhali lezi ngoba ziyingozi,” kuphetha uInsp Ncube.
