uMthunywa
Langelihle Moyo
USATHUTHUMELA owesifazane oleminyaka engu-41 weDete odlwengulwe phambi komntanakhe oleminyaka elitshumi ngomunye umakhelwane wakhe.
Inina leli elihlala eChezhou lehlelwe yisehlakalo lesi mhlaka 9 kuyonale inyanga ngehola lesitshiyagalombili ebusuku lihlezi lomntanalo.
Kubikwa umakhelwane lo, uKharito Ncube wafica inina leli lihlezi lomntanalo wathi ufuna bahlangane emacansini kodwa wala. Umetheswacala waqhubeka ephulula umamangala imilenze andubana amsunduze awele phansi wamdlwengula kanye engazivikelanga umntanakhe ekhangele unina esenziwa isihluku.
Umamangala wahlaba umkhosi edinga uncedo kodwa akulamuntu owafikayo ukuzomnceda, umetheswacala wathi eqeda wadliwa ngumnyama.
Kuvele njalo ukuthi ngalobobusuku umamangala wahamba wayalandisela omunye umakhelwane wakhe ngalokho okwasekumehlele, onguye owahamba wayabikela unina kamamangala oleminyaka yokuzalwa engu-65 ohlala esigabeni sakoMagoli, eDete.
Mhlaka 12 unina kamamangala wahamba laye emzini wakhe, andubana bayebikela uSobhuku uBitu mhlaka 15. USobhuku wathatha udaba lolu wayalubikela amapholisa eDete.
Isikhulumi samapholisa eMatabeleland North uInspector Glory Banda uthe udaba lolu lusezandleni zamapholisa, asachwayisisa ngokugcweleyo.
“Umetheswacala kakabanjwa, umamangala wahanjiswa esibhedlela se-St Patricks ukuthi ayehlolwa.
“Ngikhuthaza uzulu ongaba lolwazi lokuthi umetheswacala ungaphi ukuthi azise amapholisa aseduzane laye,” kuphetha uInsp Banda.