uMthunywa
Thokozile Mbedzi
ZILOKHU zinkemile izakhamizi zelokitshini leCowdary Park koBulawayo ngemva kokuba enye indoda idlwengule umlamu wayo oleminyaka engu-13 yamkhulelisa.
Umetheswacala esigodle ibizo lakhe ngenhloso yokuvikela umamangala, uleminyaka engu-32 yokuzalwa kubikwa udlwengule umamangala kunyanga eziyisifica munwe munye ezedluleyo njalo indaba le ivele mhlaka 23 Mpalakazi 2021 sokubonakala ukuthi umamangala uzithwele.
Ekhuluma lentatheli kaMthunywa uSazini Nkomo uthe babone into yamehlo.
“Umamangala ubehlala loyisekazi kungakho kule inyanga edluleyo uthe enanzelela ukuthi umntwana kasamanga kuhle wambuza wachaza ukuthi umkakhe wamdlwengula.
“Lokhu kwamethusa wathatha umntwana wamusa ku-scan lapho okwafika kwavela ukuba uzithwele njalo umthwalo usulelenyanga ezingu-8.
“Waveza ukuba umka-babakazi wake wamngenela engutsheni ngenyanga kaMabasa,” kulandisa uNkszn Nkomo.
Isikhulumi samapholisa koBulawayo uInspector Abedinico Ncube ebuzwa ngodaba lolu uvumile wathi solufikile ehofisini yabo.
“Amapholisa eCowdray Park achwayisisa ngodaba lapho indoda eleminyaka engu-32 eyahlukuluza emacansini umntwana oleminyaka engu-13. Umamangala uzithwele umthwalo olenyanga ezingu-8,” kutsho uInsp Ncube.
Uphethe ngokuxwayisa abazali kanye labahlala labantwana ukuthi baziphe isikhathi labantwana ikakhulu abangamankazana ukuze benelise ukubatshela nxa kukhona okwenzakale kibo.
“Abazali kumele baqaphele inguquko ezibakhona emzimbeni yabantwana.
“Sibakhuthaza njalo ukuba bamangale amacala okudlwengulwa masinyane ukuze amapholisa athole ubufakazi kusasemasinyane aphenyisise kuselobufakazi obuqotho kuthi lowo oyabe ehlukuluziwe enelise ukuthola ukwelatshwa masinyane,” kuphetha uInsp Ncube.
