uMthunywa
STANMORE
ZISELE zibambe owangaphansi izakhamizi zeStanmore kulandela ukuzwa ngenye indoda edlwengule umntakamakhelwane wayo oleminyaka emine andubana imthele inhlabathi esithweni sangasese izama ukuvala ubufakazi.
Umetheswacala esingeke samqamba ngenhloso yokuvikela umamangala ngoba bengomakhelwane, kubikwa wenze icala leli ngeviki ephelileyo.
Kubikwa umamangala ofunda uECD wathi evela esikolo labangane bakhe umetheswacala wambiza wamdlwengula uthe eqeda lapho wamthela ngenhlabathi ngenhloso yokuthi ubudoda bakhe bungaveli egcekeni.
Ekhuluma lentatheli kaMthunywa uMnumzana Bayethe Kheswa owabona abantwana laba bebaleka uthe wabona undoda lo ebambe umfundi onguECD kodwa wabaleka embona.
“Abantwana bafika begijima besithi kulomuntu obagijimisayo ngagijima ngithe ngifika safica ebambe umntwana omncane ofunda iECD esebalekile kodwa abantwana babemazi batsho ukuthi ubegqoke i-worksuit eyi-blue yikho ukudingisisa kwethu sathola ukuthi ngumakhelwane.
“Sabikela amapholisa lakanye bamthola ngemva kwesivalo esecatshile waveza ukuba ama-biscuits ahuge ngawo umntwana uwathenge ezitolo kwabathengisa phandle,” kulandisa uMnu Kheswa.
Imizamo yokukhuluma lesikhulumi samapholisa yehlule kwaze kwafika isikhathi sokudindwa kwephephandaba.