uMthunywa
Zintatheli kaMthunywa
KULENINA elileminyaka engu-65 esiqintini seSotsha eMatobo elikhala ezimathonsi ngokwetheswa icala lokubulala umkalo eselicele usizo lwabosiyazi ukuthi baligeze kulelicala ngoba limsulwa.
Inina leli uCornelia Moyo okusabalale ividiyo yalo kuviki ephelileyo litshaywa ngenswazi ngamadoda amabili azithi angabaphurofethi lithe icala eliletheswayo kalilasandla kulo njalo akula labufakazi.
Kubikwa ugogo uMaMoyo kuvidiyo wayetshayelwa ukwala ukubhadala inhlawulo yabaphurofethi laba kukanti okwakumenza ale ukwenza lokhu yikuthi babethe bazakhipha ondofa kodwa kazange ababone.
Amalunga emuli yakomkalo abelethesa icala lokubulala umuyi kanye lokusika izitho zomzimba wakhe.
Umthunywa uvakatshele kulindawo waxoxisana lesinye isakhamuzi uMnumzana Edwin Siziba oveze ukuba indaba le kayizange ibaphathe ngitsho ngoba abaphurofethi laba betshengise ukungahloniphi umuntu omdala.
“Umama lo usemdala uleminyaka engu-65 wayetshayelwa ubuthakathi kodwa ubufakazi kabazange babuveze. Ubetshayelwa ubuthakathi kuthiwa uyaloya wacuya umkakhe esedlule emhlabeni wamkhipha amaphambili lenye inyama ebusweni.
Inkomo
“Ubufakazi balokhu asilabo ngoba inyama zakhona kwakuthiwa zikhona kodwa asizibonanga njalo akulanto abaphurofethi laba abayikhupha kugogo lo. Isimanga yikuthi bamtshaya baphinda bathumba impahla zakhe, inkomo lengubo.Uveze ukuba indaba le inzima ukuyixazulula.
Ekhuluma lentatheli omunye njalo oyisakhamuzi uMnumzana Thobeleni Dube uthe kunzima ukuxazulula lindaba. “Esikusolayo yikuthi abantu bangene esigabeni sethu bathathela abantu impahla zabo. Bayadelela abafana bakaSweswe laba. Ngokubona kwami aluba umama wayengumuntu oyindoda aluba bamtshaya ngalindlela bemhlambalaza baze banqunule emphakathini, kubika uMnu Dube.
UMthunywa ukhulumisane loNkosazana Cornelia Moyo oveze ukuba kuliqiniso ukuba umkakhe wathi engcwatshwa kwakulenyama esikwe ebusweni bakhe. “Okokuqala ngithanda ukubonga bonke abasabalalisa udaba lokuhlukuluzwa kwami okwenza izigelekeqe lezi zabotshwa.
Umkami ubhubhe ngomnyaka ophelileyo. Okwenza ngahamba kubafana laba abazithi bayabona yikuthi abakibo kamkami wathi esefile bathi bemgezisa lami ngilapho watholakala esikiwe ebusweni kungazakali ukuthi inyama yakhe iyengaphi.
“Lokhu loba bengangiqondi bayakhuluma emaceleni ukuba mina yimi engazi ukuthi inyama yakhona yayangaphi kungakho ngidinga umuntu obonayo njalo okwaziyo akwenzayo angincedise ukuze lami angigeze lami ngikhululeke’’ kuphetha uNkszn Moyo.
