uMthunywa
Ncekwenhle Ncube
KUSIGA esitshiye izakhamizi zeLusulu eBinga zibambe owangaphansi kulendoda yakulesi isigaba eyafulathela amakhosikazi ayo amabili efice umazakhela wayo esemacansini lowindi yadiliza umuzi.
Lindabamlonyeni etshiye izakhamizi zakule indawo zincwebisana igwayi ngayo yenzakale kuviki ephelileyo lapho uMnumzana Joshua Mbenda obethethe isithembu sabafazi abathathu ehlukane lonkosikazi wakhe wesithathu kubangwa idlalicatsha.
Abasiki bebunda babikele intatheli ukuthi emavikini amabili adluleyo uNkosikazi Skhanyisiwe Mbenda wathunywa edolobheni ukuthi ayethenga uphahla lokunye okokufulela indlu wahle wadliwa ngumswenya.
Kubikwa wathumela impahla ebhasini yena wazihlalela edolobheni koBulawayo. Lokhu akumphathanga kuhle umkakhe okwenza weqela ibhasi ukuze ayebona unkosikazi njengoba umbiko ayewuzuza ngowokuthi uyagula.
Kuzwakale ukuthi wathi efika edolobheni wahlangana lokwamthena amadolo nanko phela wafica umkakhe esemacansini lowindi webhasi.
Kubikwa kwavuka impi eyalanyulwa ngomakhelwane kule indawo.
Iphephandaba lixhumane losobhuku wale indawo ochaze ukuthi udaba olunjalo balubikelwe nguMnu Mbenda othe ekuphendukeni kwakhe wakhalala umuzi wabuyela emzini wakhe omdala.
Kuzwakele ukuthi emhlanganweni obukhona ngoLwesithathu uMnu Mbenda ucele ukuphiwa imvumo yokudiliza umuzi wakhe ngoba efuna amazenge akhe lamafastela njengoba engasabuyeli kulowomuzi ngoba esesabela impilo yakhe.
“Thina njengabadala besigaba sizahlala phansi sibone ukuthi senzeni ngoba umfazi lo useke wabanjwa elendoda endlini. Kunjenje sesaba ukuthi kungachitheka igazi amadoda esesilwa nxa singamekela ehlala yedwa,” kuchaza uMnu Mchimba.
UMnu Mbende uchaze ukuthi yena sehlulekile ukuhlalisana lomkakhe ngoba uhlala njalo exabana lonkosikazi wakhe ngendaba zokukhomba.
“Okwami engikufunayo yikuthatha impahla zami. Kade sazama ukulungisisa indaba zethu kodwa kukhanya usafuna ukukhomba.
“Ngesaba ukuthi ngingacina sengibulawa ngamajaha lawa asakhulayo ngoba ugijima labamabhasi labomalayitsha kabambeki,” kuchaza uMnu Mbenda.
Ekhuluma lephephandaba likazulu uNkosikazi Mbenda uthe konke ngamanga yena wayevakatshele izihlobo zakhe njalo akazake abanjwe lenye indoda abantu bamqambela amanga.
“Ngamanga aluhlaza tshoko. Abantu bangibangisa ukuthi kungani ngisebenza abanye abafazi behleli ekhaya. Mina akulandoda engabanjwa layo,” kutsho uNkkz Mbenda.
