uMthunywa
UMQEQETSHI weqembu leDynamos uTonderai Ndiraya ubika ukuba ukhulekela ukuthi ngeSonto kube lokuthula, ngesikhathi iqembu lakhe lidlala leHighlanders.
Umdlalo weligi yeCastle Lager lo uzakuba senkundleni yeNational Sports Stadium.
UNdiraya ubika ukuba iviki lonke ubeguqa phansi, ekhulekela ukuthi abalandeli, abadlali lababukeli bahloniphe umdlalo, endaweni yokuthi bavuse umsindo, njengolakho okwenzakala mhla zidibene Emagumeni, ekuqaleni komnyaka.
“Umdlalo lo, esiwulandayo ngeSonto sikhangelele ukuthi uzadlalwa ngokuthula futhi abalandeli bazawuthokozela,” kutsho uNdiraya.
“Ngethemba ukuthi sonke singagcina ukuthula, kuzakuba lenjabulo.”
Umqeqetshi lo kazange azihluphe ngokulolonga abadlali, nanko phela ukholelwa ukuthi ngobukhulu bomdlalo lo, abadlali bayazi okumele bakwenze.
“Angeke sithi ukuzihlupha ngokukhuza abadlali. Bahlezi besazi ukuthi nxa kudibana iHighlanders leDynamos, umdlalo ngowabo, hatshi okamqeqetshi.
“Kimi kufana lokuthi umdlalo lo kumele uqeqetshwe ngabalandeli. Kunjalo lakuHighlanders. Akula mqeqetshi phakathi kwamaqembu la ongathi ulesandla emdlalweni. Abadlali bayazi ukuthi ngumdlalo wabantu lo. Ngumdlalo omkhulu. Awukho mkhulu umsebenzi esingawenza njengabaqeqetshi nxa kukhulunywa ngomdlalo onje.”
Ekhuluma lentatheli kaMthunywa ngoLwesithathu emini, umsekeli kamqeqetshi kuqembu leHighlanders uJoel Luphahla uthe batshele abadlali ukuthi kumele bakwazi ukuthi uhambo lweHarare lude.
“Sibatshelile abadlali bethu ukuthi nxa sisiya eHarare kumele bakwazi ukuthi silande ukunqoba, akula okunye. Kuzakuba ngumdlalo omkhulu.”
Amazwi abaqeqetshi laba atshengisa ukuba ulindwe ngabomvu umdlalo.
Abalandeli bebhola
Kusigaba sakuqala seligi yeCastle Lager, umdlalo lo wacina ungasaphelanga kuhle, nanko abasekeli beDynamos bavuka ubhova.
Kwathi sekuhlohle iHighlanders, kulehlekana labalandeli beqembu leHarare leli abakhetha ukuthi basiphune igedi, bengene enkundleni. Umdlalo awuzange uphele. Imiklomelo yonke yaphiwa iBosso.
IHighlanders ingena umango weHarare imisila iphezulu kulandela ukunqoba kwayo iBulawayo Chiefs ngempelaviki edluleyo.
Ukuza kukaBaltermar Brito esikhundleni sobuqeqetshi sekudale inguquko. Uyakutsho laye lumqeqetshi ukuba ulethe inguquko kundlela alolonga ngayo lokudlala kwabadlali.
Barltemar Brito
Ekhuluma lentatheli kaMthunywa omunye wabalandeli beqembu leBosso uNdaba “Mr White” Mhlophe ubike ukuba usekwazi ukuba imali yakhe iyangaphi ngeSonto.
“Ngiqonda eHarare, sengibhejele yona ekaMatshobana. Angeke sidliwe yiDynamos thina,” kutsho umqeqetshi lo.
“Imisebenzi yabaqeqetshi iyabonakala, lokho ngikutsho ngoba siyanqoba kulezi insuku.”
Intatheli ibuye yaxoxisana loJohannes “Signature” Ngodzo omunye owake wadla ubhedu kuBosso obike ukuba abadlali kumele bawuhloniphe umdlalo wabo leDynamos.
“Umdlalo lo ngowabo. Abadlali beHighlanders abafunde kithi njengabafowabo ukuthi nxa usemdlalweni omkhulu njengalo, kumele uzibambe njalo udlalele ukunqoba.”
Imidlalo yeligi yeCastle Lager:
NgoMgqibelo: ZPC Kariba v Bulawayo City (Nyamhunga), Harare City v Whawha (National Sports Stadium), Chicken Inn v Caps United (Luveve), FC Platinum v Yadah (Mandava), Black Rhinos v Manica Diamonds (Vengere), Tenax v Ngezi Platinum (Sakubva)
NgeSonto: Dynamos v Highlanders (National Sports Stadium), Bulawayo Chiefs v Herentals (Luveve), Craneborne v Triangle (Vengere)
