Ethel Ncube
AZILANKANI izakhamizi zeSinamabwa eZhombe ngesenzo senye indoda ebulele umfowabo isola ukuthi kungani emlamule ngesikhathi esilwa lomunye kubangwa ukuthi yiliphi iqembu elidlala kuhle kubukelwe umdlalo wenguqu.
Umuyi uEdmore Mhike ubulewe ngumnewabo uPeter Mhike esola ukuthi kungani elamule umsindo obukhona esilwa lomunye bebukele umdlalo weqembu leLiverpool leManchester United kumabonakude.
Esinye isakhamuzi esikhulume lentatheli kaMthunywa esihlala esiqintini lesi, uMnumzana Dumisani Zhou ubike ukuba bamadolonzima ngesehlakalo lesi.
“Sasisezitolo sibukele umdlalo wenguqu kudlala iLiverpool leMan U. Omunye esasibukele laye uJoakim Moyo wathi kuPeter iqembu elidlala ngcono yiLiverpool lokhu akuzange kumphathe kuhle uPeter baqala ukuphikisana. Bathe bephikisana bacina bentshintshela ezandleni baqala ukulwa.
“Ngesikhathi besilwa uEdmore wazama ukulamula umnewabo kanti yayisiwuchithile umuthi inkonyane ngoba wahle walanda yena ngebhentshi wamtshaya wawela phansi wabuye wadobha ilitshe wamphinda futhi elokhu elele phansi. Ngokuswelakala kwenhlanhla uEdmore wahle wedlula emhlabeni lesibhedlela kazange ayefika. “Sisakhakhamele uPeter wahle wacela ezinyaweni, sikhuluma nje akwaziwa ukuthi waqonda ngaphi, uyadingwa,” kutsho uMnu Zhou.
Isikhulumi samapholisa eMidlands uInspector Emmanuel Mahoko ubike ukuba ubachwayisisa udala lolu.
“Indaba enjalo ifikile endlebeni zethu. Amapholisa asachwayisisa ngodaba lokubulawa komuntu ngumfowabo.
“Sicela ongabe elolwazi asincedise ngokusipha ulwazi olungenza sibophe uPeter Mhike owabaleka ngemva kokudala icala lokubulala,” kuphetha uInsp Mahoko.
