uMthunywa
AMANZI yimpilo —ngamazwi ajwayelekileyo la ngoba phela umuntu kanye lazo zonke izinyamazana lezinanakazana zomhlaba ngeke zaphila zingelawo amanzi.
Abantu yibo abasebenzisa amanzi kakhulu ngoba bawasebenzisa ukupheka, ukuwatsha, ukuthelela, ukugezisa izinto ezitshiyeneyo lokunye nje esingeke sakubala sikuqede.
Kulezinsuku edolobheni lakoBulawayo udaba olusegudwini ngolokuvalwa kwamanzi.
Amalokitshi amanengi akuleli dolobho aqede insuku ezedlula itshumi engela ngitsho lethonsi lamanzi ezimpompini ezisezindlini zabo loba ikhansili isithi kumele ziqede insuku ezinhlanu.
Ukuswelakala kwamanzi kuludubo oluzwisa ubuhlungu kakhulu ngoba kungekho okungathatha indawo yamanzi. Amagetsi angaswelakala ezindlini abantu balakho ukupheka ngomlilo, abanye njalo ngegasi lokunye okwehlukeneyo, kodwa amanzi wona kuyabe kudingakala wona qha hatshi okunye.
Abantu basemalokitshini ambalwa bebewaginqela amanzi ngoba phela kwezinye indawo lezibholane kazikho kuthi lapho ezikhona abantu sebetshona baze balale bekundwendwe ezesabekayo belinde amanzi.
Abafana abagangileyo bona besebethatha lelithuba lokuswelakala kwamanzi ukuthi bathengisele abantu izigubhu zamanzi.
Lokhu sokungumkhuba omubi osusenziwa ngabatsha kungakho kuyadingeka ukuthi uHulumende angenele kube lendlela yokuqeda udubo lolu ngoba ngeke abantu bakhale ngodubo lwamanzi umnyaka ngomnyaka kungekho okwenziwayo.
Kuyadingeka futhi ukuthi ikhansili igebhe izibholane emalokitshi wonke ukuze nxa kungavalwa amanzi abantu benelise ukuwathola ezibholaneni eziseduzane labo hatshi ukuthi bahambe imango emide bewadinga.
Ngaphandle kokuthi ikhansili ivala amanzi ngoba amanzi asemadamu malutshwana njengoba lapho okulamadamu akulazulu kuyadingeka ukuba kwenziwe eminye imizamo yokuba kutholakale amanzi.
Ngalokhu kusegcekeni ukuthi vele amanzi lonyaka azakuba ludubo kulelidolobho kungakho kungaba ngumbono omuhle ukuba ikhansili ihle iqalise ukugebha izibholane kanye lamanye amadamu ukuze abemanengi kuminyaka ezayo okuzenza abantu bangadubeki.
Yinto engadingekiyo leyo ukuthi ichwayisiswe ngoba kuvele kusegcekeni. Njengoba amanzi eyimpilo kufanele ke kubonakale ukuthi ayakhiwa amanye amadamu njalo zigejwe izibholane ukuze phela abantu bathole amanzi ngoba eyingxenye yempilo yabo.
Silethemba lokuthi ikhansili yakoBulawayo kanye loHulumende bazathatha amanyathelo ngaloludaba ngoba ukusilela kwamanzi kulakho njalo ukucina kubangela imikhuhlane efana le-cholera evele isiqalile ukuhlasela khonapha edolobheni.
Lengatsha ezizimele zodwa lazo silethemba ukuthi zizancedisa ngoba phela siyazi sonke ukuthi isandla sikaHulumende sifitshane ngeke senelise ukugcwalisa izifiso zabantu bonke sizimele sodwa.
