uMthunywa
Ethel Ncube
KULENINA leSt Elizabeth esigabeni seMbembesi bucwadlana kweNsuza osokuvele ukuthi selibhonga njengenkomo kulandela ukubulala umkalo ngoba ebesethandana lomakhwapheni, uMthunywa uyakuveza lokhu lamhlanje.
Inina leli okutholakale ukuthi nguNaMaNa nje kuphela kubikwa ngesikhathi ebhonga waveza njalo ukuthi kabulalanga umkakhe yedwa, kodwa uselezidumbu ezintathu phansi.
Kucatshangelwa njalo ukuba uNaMaNa engakabulali umkakhe ngetshefu, watshela umakhwapheni womkakhe okutholakale ukuthi nguNaBetty ukuthi usekhathele ngokusheya laye indoda.
Ekhuluma loMthunywa omunye wezakhamizi zakule indawo uNkosazana Sifikile Dewa uveze ukuba sebemesaba umama lo ngoba akukhuluma ngesikhathi efikelwe lidlozi kuveza ukuthi ngumkhunkuli omkhulu.
“Indaba le inzima, uNaMaNa wazikhulumela ngowakhe umlomo ukuthi ulezidumbu ezintathu phansi ezibalisela esomkakhe, umzukulu kanye lesomkhwenyana wakhe.
“Waveza njalo ukuthi yena uyaphosa abantu njalo wake wawa egade iwombela,” kuchaza uNkszn Dewa.
Lindaba esegudwini njalo okunathiswana ngayo itiye kubikwa isikhulunywa lakwamanye amazwe lapho okulezakhamizi zakule indawo.
“Okwenze uNaMaNa waze wabhonga njengenkomo yikuthi ubecunulwe yikuthi abantu bahamba bekhuluma ngaye kuze kuyefika laseGoli. Ubefuna ukutshaya abaphurofethi abamkhupha idlozi leli esithi yibo asebemenza inhlekisa emphakathini,” kulandisa uNkszn Dewa.
Intatheli iphinde yaxhumana lesinye isakhamuzi esale ukuveza igama ngoba sisesabela impilo yaso esichaze ukuba kuliqiniso ukuba kulendoda eyabulawa ngumkayo.
“Indaba le inzima, sesaba lokukhuluma ngayo ngoba asikwazi ukuthi ngubani azalandela ukumbulala ongakhuluma indaba zakhe. UNaMaNa wafika lapha engadlanga nkotshana esithi yena usekhulunywa indawo yonke ngodaba lwakhe lokubulala njalo akumphathi.
“Esikuzwe ngaye kusiqeda amandla ukuthi ulezidumbu ezintathu phansi, lokhu kunzima abanye bafela amahala ikanti lendoda kwakusehlulani ukuthi kuhlalwe phansi kukhulunywe kulokuthi kuze kucitshwe umphefumulo. Asazi ukuthi kuyozala nkomoni njengoba sekuvezwe imfihlo engaka,” kuchaza isakhamuzi sakuleyondawo
Iphephandaba likazulu lixhumane lomunye umphurofethi osebenzela kule indawo uMaDlamini oveze ukuba kunzima ukutsho indaba zabantu.
“Mina endabeni lezi kunzima ukutsho indaba zabantu ngoba angifuni abantu baxabane njalo ngilande ukuzobancedisa kuphela,” kuphetha uMaDlamini.
