uMthunywa
Wayne Ncube
KULENDODA eleminyaka engu-18 yeFilabusi emiswe phambi komthethwandaba omkhulu wakoBulawayo isetheswa icala lokubulala enye indoda ngemva kokuyitshaya ngembokodo ekhanda.
Umsolwa uMbongiseni Sibanda (18) wesiqintini seDingumuzi umiswe emthethwandaba kuyonale iviki esolwa ngokubulala uCarlos Ndlovu (18) ohlala esiqintini seZamanjalo, kubangwa ukutholakala eme lentombi kaCarlos eleminyaka engu-13.
Umtshutshisi uMnumzana Kudakwashe Jaravaza ubikele inkundla ukuthi mhlaka 18 Mabasa intombi kaCarlos, ibizo siligodlile, yaboleka umakhalekhukhwini kuSibanda bavumelana ukuthi azomthatha ilanga selithambeme.
Kubikwa uSibanda wathi esesiyathatha umakhalekhukhwini wakhe waficwa nguNdlovu owayehamba lomngane wakhe, uLungisani Mpofu.
Inkundla izwe ukuthi uSibanda ebona uNdlovu wacela ezinyaweni okwabangela ukuthi uSibanda abuze ukuthi obalekayo ngubani njalo ubalekelani.
Umtshutshisi uveze ukuthi uSibanda ngemva kwesikhatshana wathutsha enyenya wafika watshaya uNdlovu ngembokodo yelitshe engaba yi-1 945grammes ekhanda okwabangela ukuthi awele phansi aqaleke.
USibanda wabaleka umangwanyana kodwa uthe enanzelela ukuthi akulamuntu owayemlandela waphenduka emuva lapho afica uNdlovu ethe daca phansi wazama ukumnceda lanxa wacina ephelela ezandleni zakhe.
