uMthunywa
Ethel Ncube
ZIKHAKHAMELE izakhamizi zeSojini eMbembesi kulandela ukuzwa ngenye indoda etshayelele umntwana phansi waze wedlula emhlabeni andubana ithathe umzimba wakhe yayawulahla egangeni.
Indaba le yenzakale ngoLwesine lweviki ephelileyo lapho umetheswacala uAndrew Jackson oleminyaka engu-50 emiswe phambi komthethwandaba.
Kuvele ukuba uAndrew Jackson wahlukana lomkakhe uCharity Moyo oleminyaka engu-23 okunguye ozala umntwana lo ongumamangala.
Mhlaka 31 kuNcwabakazi umetheswacala kubikwa wahamba lapho okuhlala khona uMoyo owayengumkakhe wafika wathatha umuyi uMary Jackson wahamba laye emzini wakhe.
Kubikwa phakathi kobusuku umetheswacala wavuka waqala ukutshaya umntwana ngezandla emzimbeni wonke qede wamthwala ngenyawo andubana atshayelele ikhanda lakhe phansi.
Uthe esenanzelela ukuthi usebulele umntwana wathatha isidumbu somntwana wayawutshiya ku-397km peg emgwaqweni osuka eHarare usiya koBulawayo, wasebuyela ngekhaya.
Ngosuku olufanayo owayengumkakhe wafika emzini kametheswacala esithi uzothatha umntwana wathola engekho.
Ngemva kwezinsuku ezine umetheswacala elokhu esithi kazi ukuthi umntwana ungaphi uMoyo wacina esiyabikela amapholisa.
Umama kamuyi wahamba wayabika emapholiseni ngelanga lesine ethi umntwana kabonakali emapholiseni aweMbembesi. Ngelanga lesihlanu amapholisa ahamba emzini kametheswacala athola amachathachatha egazi phansi lengcekeza yomuntu endlini kametheswacala yokulala emnyango.
Umetheswacala wayekhona ngesikhathi amapholisa efika wahle wazikhulumela ukuba ubulele umntwana wahamba lomzimba wayawutshiya emgwaqweni okwenza wahle wabotshwa.
Umetheswacala wahamba wayabatshengisa lapho atshiya khona umzimba emgwaqweni osuka eHarare usiya koBulawayo kodwa kabazange bathole lutho. Umzimba waze watholakala egangeni uvele ususonakala, inyawo lezandla kusendaweni eyodwa kuthi amanye amalunga omzimba ayegcwele indawana yonke. Wathwalwa umzimba wahanjiswa esibhedlela seUnited Bulawayo Hospitals ukuze uyehlolwa imbangela yokufa kamuyi.
United Bulawayo Hospitals
Ekhasini lamapholisa le-Twitter amapholisa aveze ukuba indaba enjalo yenzakala.
“Amapholisa asebophe uAndrew Jackson oleminyaka engu-50 obulelele umntanakhe uMary Jackson oleminyaka engu- 5 yokuzalwa eSojini eMbembesi,” kuphetha amapholisa ekhasini labo leTwitter.
