uMthunywa
Francis Dhliwayo
ZIKHALA ezimathonsi izakhamizi zeBurombo koBulawayo ngendawo yazo esiphenduke yaba yisigodlo sobugebengu kubangelwa yikuswelakala kwamagetsi phose inyanga ezimbili.
Izakhamizi zeBurombo Flats zibikele uMthunywa ukuthi sezihlezi ziphethe izibindi ngezandla ngoba ubugebengu sebuqalisile endaweni le njengoba sekulenyanga ezimbili kungela magetsi.
Kuzwakale ukuthi iZesa yacitsha amagetsi efulethini elilodwa ngoba kubikwa ukuthi ikhansili ilesikwelede sayo okungasatholakalanga ukuthi ngesemalini.
UMthunywa uxoxisane lesinye isakhamuzi esingathandanga ukubethwa ngegama esiveze ukuthi sebelenyanga phose ezimbili bengela magetsi njalo okubamangalisayo yikuthi elabo lodwa i-flat yilo elingelamagetsi.
“Asisakwazi ukuthi sithini ngaloludaba ngoba lathi siyabhadala imithelo nyanga zonke njengabanye kodwa yithi sodwa esingelamagetsi,” kutsho isakhamuzi lesi.
“Selokhu kubemnyama lapha ubugebengu sebuqalisile ngoba lalabo abasuka kwezinye indawo sebebuya emnyameni bezoganga besazi ukuthi kabasoze babonwa muntu. Intsha layo isigcwala khonapha kungavele kubemnyama izothatha izidakamizwa bathi ngemva kokwenza lokhu bebesebesiba yizephulamthetho,” kulandisa isakhamuzi lesi esingathandanga ukuqanjwa ngebizo.
UMnumzana Makhosi Ndlovu laye okhulume loMthunywa uthe kulomunye umakhelwane wabo owaphendukela esibhedlela ngemva kokuhlaselwa yizigilamkhuba lezi.
“Sikhuluma nje ngeviki ephelileyo kulomunye ubaba owaphenduka esibhedlela ngemva kokutshaywa emnyango wendlu yakhe wathathelwa imali. Okunye okuhluphayo ngendawo yethu yikuthi kuhlala abantu abanengi kungakho nxa sekumnyama kubanzima ukubona ukuthi lowomuntu ngowalapho kumbe hatshi,” kutsho uMnu Ndlovu.
Esinye njalo isakhamuzi esiziveze ngokuthi nguMnumzana Kelton nje kuphela sichaze ukuthi sebehamba nzima ebusuku nxa bevela emsebenzini ngobunyama obukule indawo.
“Kudala sahlala kulindawo kodwa lokhu osekusenzakala asikaze sikubone ngoba lasemini kuyabe kumnyama njalo ebusuku umuntu akumelanga atshayelwe lihola lesitshiyagalo lunye engekho endlini ngoba angalimala.
“Lanxa usiya komakhelwane sokumele uphume ungaphathanga mali kumbe umakhalekhukhwini ngoba lasemnyango wakho uyabanjwa inkunzi,” kutsho uMnu Kelton.
Uqhubekele phambili esithi bacitshelwa amagetsi ngabeZesa ngoba besithi yiyo indlela yokuthi bathole imali abayikweledwa yikhansili.
“Sizwa kuthiwa ikhansili ilesikwelede seZesa yikho kwacitshwa amagesti lapha kodwa asikezwa ukuthi kuzakwenziwa njani ngalokhu ngoba lathi sesibhekane lodubo olukhulu,” kutsho uMnu Kelton.
UMthunywa uxhumane lokhansila wakule indawo uMusonda yena owale ukukhuluma ngaloludaba.
“Indaba yezakhiwo kangiyingeni mina lokhu kufuna uyekuzwa ku-town clerk,” etsho equma ucingo lwakhe uKhansila Musonda.
Imizamo yokukhulumisana labekhansili ngodaba lolu yehlule kwaze kwafika isikhathi sokudindwa kwephephandaba.
