uMthunywa
Ethel Ncube
KULOMGULUKUDU wendoda yakoBulawayo obotshwe ngoMgqibelo kuviki ephelileyo esetheswa amacala amathathu okubulala, lamanye okugqekeza ehlomile atshontshe iUS$28 555 kunye leR120 000 ofe ngelanga elifanayo.
UGift Sabata oleminyaka engu-44 yokuzalwa ubotshwe ngabacuphi ngoMgqibelo ekuseni ngehola lesibili endlini yedlalicatsha lakhe, eCowdray Park esetheswa amacala okubulala lokugqekeza ehlomile enzakala kusukela ngenyanga kaMpalakazi nyakenye kusiya kuLwezi lonyaka.
UMthunywa uzwe ukuba amapholisa ohlangothi lweCID Homicide kunye leSupport Unit Special Tactics kubikwa besebelesikhathi bemlandela bambhaca endlini yedlalicatsha bamfica elombhobho wohlobo lwe-Rossi Revolver ulenhlamvu ezinhlanu, lomunye obizwa ngokuthi yi-Taurus Revolver ulenhlamvu eziyisithupha kunye le-Peatra-Beretta Gardone Vt.22 ungelanhlamvu etholakale eTshabalala Game Santuary, eFourwinds koBulawayo.
UMthunywa uxhumane lesikhulumi samapholisa elizweni uAssistant Commisioner Paul Nyathi obike ukuba udaba olunjalo sebelwamukele.
“Sibophe uGift Sabata obethinteka kumacala atshiyeneyo okubulala lokugqekeza ehlomile ocine edlula esibhedlela sakoBulawayo ngosuku abotshwe ngalo,” kuphetha uAsst Comm Nyathi.
USabata ubethinteka kumacala amabili okubulala langu-13 okugqekeza ehlomile lapho atshontsha imali engange US$58 639. Umetheswacala ubethinteka kucala lokubulala elenzakala mhlaka 28 Nhlangula lonyaka eFortunes Gate, eMatsheumhlophe, koBulawayo lapho ayeloClifford Leniency Nyoni abatshontsha khona iUS$1 000.
Umetheswacala ubethinteka futhi kwelinye icala lokubulala elenzakala eRichmond ngenyanga kaNhlolanja. Kukanti ngoNkwenkwenzi wagqekeza esikolo sePetra wantshontsha i-US$21 555 waphinda wayatshontsha eRangemore ehlomile wathatha US$8 000 leR120 000.
