uMthunywa
Thokozile Mbedzi
KULENDODA yepulazini leCrocodile Farm eSigodini ebotshwe ngamapholisa kulandela ukutholakala itshayela imota eyitshontshileyo andubana iveze ukuba kungumkhuba wayo ukutshontsha imota iyozithengisa elizweni leMozambique.
Kubikwa uIgnatius Sounds Mudzudzu oleminyaka engu-55 ovela eChegutu ubesetshontshe imota ezintathu esiyazithengisa.
Kuzwakale ukuba le eyesithathu ayitshontsha mhlaka 7 Nhlolanja ime duzane leTower Block koBulawayo yiyo eyenza wabotshwa nanko phela yayile-tracking system.
Isikhulumi samapholisa koBulawayo uInspector Abednico Ncube uthe amapholisa ohlangothi lwabacuphi abevele echwayisisa ngokutshontshwa kwezimota.
“Umetheswacala ubesetshontshe imihlobo emithathu yezimota iMazda, Datsun kunye leNissan.
“Le eyesithathu yayimiswe yisisebenzi sekhansili singena emsebenzini eTower Block sithe sitshayisa safica imota ingasekho. Sahle sayamangala savela lokuba imota ile-tracking system.
“Mhlaka 20 Nhlolanja ngehola lokuqala ngemva kwemini esinye njalo isisebenzi sakoFazak satshiya imota yohlobo lweMazda B1800 phandle. Sithe sisiyatshayisa ngo 8 ntambama yayingasekho phandle imota.
“Kuthi imota yesithathu iNissan B1600 yona yatshontshwa mhlaka 4 Mbimbitho,” kulandisa uInsp Ncube.
Kubikwa umetheswacala ebotshwa eCrocodile Farm eSigodini etshayela enye yezimota lezi, amapholisa athi esembuzisisa kwavela ukuba ulesazela ngezinye ezatshontshwayo andubana achaze ukuba wazithengisela kweleMozambique.
Okwakhathesi umetheswacala uncedisa amapholisa ekuchwayisiseni kwabo.
“Njengamapholisa sithanda ukuxwayisa abatshayeli ukuba kabakhiye izimota zabo ngoba lapha loba sisithi lezo zimota zindala kodwa kwamanye amazwe bayabe bezifuna. Kungakho kababone ukuba imota zabo ziyakhiywa zikhathi zonke,” kuphetha ulnsp Ncube.
