uMthunywa
Nomthandazo Ndlovu
ZISELE zinkemile izidakwa ebezinatha kwenye ibhawa eZvishavane elinye inina selibhuqe umakhwapheni womkalo lamnqunula wasala lempahla yangaphansi kuphela.
Lesisiga senzakale ngoMgqibelo odluleyo lapho inina okutholakale ukuthi nguMai Prim nje kuphela lingene kwenye ibhawa edumileyo edolobheni leli lafika latshaya uNkosazana Tendai Msipha laze lamnqunula kubangwa uMnumzana Taurai Ngwenya.
Ekhuluma loMthunywa uMnumzana Tapiwa Sibanda uthe okwenzakala mhlalokho ebhawa kwenza utshwala baphela kancane emakhanda abantu.
“UTendai ngumuntu vele oyazakalayo ukuthi uzwana lamadoda abantu, uMai Prim kukhanya ubesezwe udletshana lokuthi umkakhe uthandana loTendai njalo ibhawa le yiyo abajwayele ukuhlangana khona,” kuchaza uMnu Sibanda.
“Mhla uMai Prim emtshaya sabona okunye lapha, kwakusebusuku abantu bezijabulela. Sezwa sokungumkhosi lapho okwakunathela uNgwenya labangane bakhe kanye loMsipha kanti sezisukelene. UMsipha watshaywa baze bamdabulela izigqoko,” kutsho uMnu Sibanda.
Omunye ufakazi oqotho ongathandanga ukubethwa ngegama owayenatha loNgwenya uthe bona bathi besanatha babona unkosikazi wakhe ethutsha ebhawa esidla amalahle esithi ufuna uTendai (Msipha).
“Thina sabona ngoMai Prim sethutsha engasadlanga nkotshana esithi ufuna ukubona umfazi othathela abantu amadoda, uNgwenya yena wahle wabaleka waphuma ebhawa ngoba emazi unkosikazi wakhe ukuthi nxa esezondile kuyafiwa.
“Mina ngibona ingani kulomuntu osebenza lapha kumbe vele ojayele ukubabona bebonke owatshela uMai Prim ukuthi kulomuntu othandana lomkakhe, ngoba wayengeke aphonguzowela ebhawa ebusuku engazwanga lutho,” kutsho lumfakazi.
UMnu Ngwenya ebuzwa ngodaba lolu uthe kuliqiniso ukuthi umkakhe watshaya uMsipha wamdabulela izigqoko kodwa ukuthi uthandana loMsipha ngamanga.
“Unkosikazi wafika esilwa sibili ebhawa lapho enganginathela khona labangane bami, loTendai (Msipha) ngumngane wami esafunda sonke lokhu okokuthi siyathandana angikwazi, ngabantu abafuna ukungixabanisa lomkami nje,” kuchaza uMnu Ngwenya.
Imizamo yokukhulumisana loNkszn Msipa yehlule ngoba ucingo lwakhe belungabanjwa.
