uMthunywa
Ethel Ncube
BADLELA egilweni abafundi besikolo seSilobi eMatopo njengoba endleleni abadlula kiyo besiya esikolo sokuzalele ingwe, okungubhinya osethwalele abafundi ubhulo nanko kubikwa uyabaxotshanisa nxa besedlula besiya esikolo.
Ubhinya lo, oke wadlwengula elinye inina ensukwini ezisanda kwedlula kubikwa usebangela ukuthi abafundi abangamantombazana badonse inyawo nxa kumele baye esikolo.
UMthunywa uthole ukuba umetheswacala lo, okuthiwa nguNgqabutho nje kuphela, kasalali ngakibo kodwa usehlala khonale ezintabeni.
UMthunywa uxhumane lesinye isakhamuzi esiyale ukuveza igama laso sisesabela ukunyenyelwa ebusuku.
“Abantwana abangamankazana nxa besiya esikolo bathi bayambona ubhinya lo abagijimise efuna ukubabamba osokusenza bangasathakazeleli ukuya esikolo ngenxa yokwesaba isigebenga lesi.
“Abantwana abanengi abangamankazana bacina belova esikolo ikakhulu nxa bengafica abanye sebehambile ngoba sokungcono ukuthi bahambe belihlekana,” kulandisa isakhamuzi lesi.
Intatheli ibuye yakhulumisana loMnumzana uEnock Ndlovu othe umuntu lo kumele abanjwe.
“Abantwabethu sebefunda nzima ngomdlwenguli lo ngoba sebehlala besesaba. Amapholisa sesawabikela kodwa kasikawaboni efika ukuze asincedise njengezakhamizi. Umfana lo uyingozi emphakathini, kumele ajeziswe,” kutsho uMnu Ndlovu.
Isikhulumi samapholisa esabelweni seMatabeleland South uInspector Loveness Mangena uveze ukuthi indaba yomdlwenguli osehluphile sebeyamukele.
uInspector Loveness Mangena
“Amapholisa amukele umbiko wendoda okuthiwa nguNgqabutho okunakanelwa ukuba isidlwengule umuntu oyedwa kodwa indaba yokuthi uyagijimisa abafundi kayikafiki kithi. Umetheswacala lo siyamdinga ngoba usolwa ngecala lokudlwengula, sicela abalolwazi ngokuthi ungaphi basincedise abanjwe,” kuphetha uInsp Mangena.
